“Мэргэжлийн боловсрол сургалт-Ажилсаг Монгол” үндэсний зөвлөгөөнийг энэ сарын 18, 19-нд зохион байгуулахаар болжээ. Энэ талаар УИХ-ын гишүүн Д.Тэрбишдагва, Хөдөлмөр, нийгмийн хамгааллын дэд сайд С.Мөнгөнчимэг, ХБНГУ-аас Монгол Улсад суугаа Элчин сайдын яамны нарийн бичгийн дарга Кристиан Гласс нар мэдээлэл хийлээ. Өнөөдрийн байдлаар улсын хэмжээнд төрийн өмчийн болон хувийн хэвшлийн нийт 85 мэргэжлийн боловсрол, сургалтын байгууллагад 35.8 мянган суралцагч суралцаж байгаа аж. Статистик мэдээллээр дунджаар жил бүр 19.5 мянга орчим залуус төгсч, тэдний 46-55 хувь нь ажлын байранд шууд зуучлагдаж, 8-10 хувь нь дараагийн шатны сургалт болон их, дээд сургуульд шатлан суралцдаг байна. ХБНГУ-аас Монгол Улсад суугаа Элчин сайдын яамны нарийн бичгийн дарга Кристиан Гласс “Бид Германы хөгжлийн хамтын үйл ажиллагааны хүрээнд мэргэжлийн боловсролын салбарт дэмжлэг үзүүлсээр ирсэн. Цаашид Герман Улсын жишгээр Монголын нөхцөл байдалд тааруулж онол, практик хосолсон сургалтыг бий болгоно. Мөн Улаанбаатар хот дах Барилгын Политехник коллежид Герман хэлний сургалтыг нэвтрүүлсэн. Цаашдаа Герман Улсад очиж дадлага хийлгэхээр төлөвлөж байна” гэв.
Мөн УИХ-ын гишүүн Д.Тэрбишдагва “Өнөөдөр арван жил төгссөн хүүхдүүдийн 80 хувь нь дээд сургуульд ороод, дээд сургууль төгссөн хүүхдүүдийн 79 хувь нь мэргэжлээрээ ажиллаж чадахгүй байна. Бид 2030 он хүртэл гучин мянган хүүхэд, залуусыг мэргэжилтэй боловсон хүчин болгох зорилго тавьсан. Мөн орчин үеийн төнөг төхөөрөмжинд суурилагдаж хичээл сургалтаа явуулах хэрэгтэй байна” хэмээв. Хоёр өдрийн турш үргэлжлэх зөвлөгөөний эхний хэсэг Налайх дүүрэгт болж, мэргэжлийн боловсрол сургалтын салбарынхнаас гадна ажил олгогч, олон улсын судлаачид, энэ чиглэлийн эрдэмтдийг оролцуулах юм байна. Зөвлөгөөнөөр “Мэргэжлийн боловсрол сургалтын салбарын бодлого, үйл ажиллагаа, тулгамдаж буй асуудал”, “Мэргэжлийн боловсрол сургалтын чанарт нөлөөлөх гол хүчин зүйлс”, “Хөгжлийн бэрхшээлтэй иргэдийн ур чадвар эзэмших боломжууд” зэрэг олон сэдвээр илтгэл тавьж хэлэлцүүлэг өрнүүлэх ажээ. Харин зөвлөгөөний хоёр дахь өдрийн арга хэмжээг Төрийн ордонд зохион байгуулах юм байна. Мөн энэ үеэр Төв талбайд мэргэжил сурталчлах өдөрлөг болж, МСҮТ болон Политехник коллежууд сургууль болон мэргэжлээ сурталчлахаас гадна элсэлт авч, Хөдөлмөрийн биржийн үйл ажиллагаа ч зохион байгуулах ажээ.
