НҮБ-ын гамшгийн эрсдэлийг бууруулах газар, ОБЕГ-тай хамтран зохион байгуулж буй гамшгийн эрсдэлийг бууруулах Азийн сайд нарын II дугаар бага хурлын хүрээнд Сүхбаатрын талбайд үзэсгэлэн нээлтээ хийлээ.

Уг үзэсгэлэнгийн гол зорилго нь ард иргэдэд гамшгийн эрсдэлийн талаарх мэдээллийг үнэн зөвөөр  хүргэх, зайлшгүй нөхцөл байдлаас өөрийгөө болон бусдыг хэрхэн хамгаалах талаарх сургалт нээлттэйгээр танилцуулахад оршиж буй аж . Хоёр жилд нэг удаа зохион байгуулагддаг Азийн сайд нарын хурлыг анх 2016 онд Энэтхэг улсад зохион байгуулсан байна. Хуралд Ази, Номхон далайн 50 гаруй улсын 2500 гаруй зочид төлөөлөгчид оролцож байгаа юм байна.

“Улаан загалмай” нийгэмлэгийн захиргаа, удирдлагын газрын дарга Э.Энхтайван “ Манай нийгэмлэгээс энэ үзэсгэлэнд  500 гаруй  залуучуудаас 250 орчмыг сонгон шалгаруулж ажиллуулж байна. Тэдгээр залуус маань энэ үзэсгэлэн болон онгоцны буудал , зочид буудал, хурлын байр зэрэг газруудад зочид төлөөлөгчдөд үйлчилгээ, зааварчилгааг үзүүлж байна” гэв.

Үзэсгэлэнгийн үеэр урлагийн үзүүлбэр, гамшгийн үед анхны түргэн тусламж үзүүлэх сургалт, хамгаалалтын хувцас хэрэглэл, улс орнуудын хүмүүнлэг,тусламжийн байгууллагуудын танилцуулах үйл ажиллагаа явагдаж байна.

Үзэсгэлэн хоёр өдөр үргэлжилнэ.

Л.Сайнбаяр