Хайди Клум: Гэр бүлтэйгээ байх үедээ хамгийн их үзэсгэлэнтэй харагдддаг байх Дэлхийн загварын ертөнцийн хамгийн сүр дуулиантай, нижгэр нь “Victoria’s Secret Show” гэдэгтэй маргах хүн үгүй биз ээ. Victoria’s Secret-ийн сахиусан тэнгэрүүдийн нэг Хайди Клумын “Cosmopolitan”-д өгсөн ярилцлагыг хүргэж байна. -“Victoria’s Secret” шоуны од нь болж гялалзсан нууцаасаа хуваалцахгүй юу?
-Сандрахгүй байж, үзэгчдийн сэтгэлийн хөөрлийг хэрхэн дээд цэгт нь хүргэх, мэдээж сахиусан тэнгэрийн далавчтай алхаж сурах зэргийг дурдмаар байна. Хамгийн гол нь энэ бол хувцас загвараасаа илүүтэй үзэгчдэд шоу гэдгийг утгаар нь мэдрүүлэх юм. Энэ бүхнийг хэрхэн хийж гүйцэтгэхээ мэдэж байгаа тохиолдолд “од” болж гялалзах бол ердийн зүйл шүү дээ.
-Өөрийнхөө хүрсэн өндөрлөгт үлдэхийн тулд та юу хийдэг вэ?
-Хамгийн гол нь хөдөлмөрч байх нь чухал. Би өөрийгөө олон төрлийн ажилд сайн гэж боддог. Сар бүрийн эхэнд би шинэ дэвтэр дээр өөрийн ажлын талаар хөтөлдөг. Үүндээ уулзалтууд, шинэ санаа зэрэг ажлын талаар бүх зүйлээ бичдэг юм.
-Та хувцас загварын өндөр мэдлэгтэй хүмүүсийн нэг. Таны бодлоор үргэлж халуухан төрхийг бий болгодог ямар хувцас байдаг вэ?
-Миний бодлоор бариу хар даашинз, маш өндөр өсгийтэй гутал үргэлж дур булаам харагдуулж чаддаг. Ийм хувцас өмссөн бүсгүйчүүд ямар ч эрийн нүдийг хужирлуулж чадна гэдэгт итгэлтэй байна. Яагаад хар өнгө вэ гэвэл хар бол “хаан” өнгө шүү дээ. Түүнчлэн аливаа гоёл чимэглэлтэй үргэлж зохицдог. Хүсвэл та дээгүүрээ хүрэм өмсч болно гээд л олон янзаар хувцаслаж болдог.
-Та үнэрээр гоолиг юмаа. Жингээ барихын тулд ямар арга хэрэглэдэг вэ? -Би бүдүүн ч биш, туранхай ч биш. Миний бодлоор хүмүүс 90-60-90 байх гээд хэтэрхий их хийчээгээд байдаг шиг санагддаг. Хувцас үйлдвэрлэгчид дандаа л ноль размераар хувцсаа хийдэг. Тйимээс худалдан авагчид энэ дарамтад өөрийн эрхгүй автдаг. Миний бодлоор энэ тийм ч зөв зүйл биш. Үүнээс л болоод хүмүүс өөрт бараг байж таарахгүй жиндээ хүрэх гэж их олон хэцүү зүйлсийг туулж байгаа. Эрүүл бус туранхай байга гэдэг сайн зүйл биш. Миний хувьд өглөө бүр зургаан км гүйдэг.
-Энэ л таны гоо сайхны нууц гэж үү?
- Би дөрвөн хүүхэдтэй. Тэднийхээ ачаар миний эрүүл мэнд биеийн галбир сайхан байгаа гэж боддог. Хүүхдүүд тогтмол хөдөлгөөнтэй байхыг шаарддаг. Хүүхэд бүртээ анхаарал хандуулах шаардлагатай байдаг. Манай том хүүхэд одоо долоон настай. Тэд минь хайр хүрэм бяцхан сахиусан тэнгэрүүд.
- Хүүхэд байхдаа авхуусан зурагнаас тань харахад их хувцас сольдог байжээ. Багаасаа загварын мэдрэмж өндөр байжээ.
- Сайн анзаарсан байна шүү. Багаасаа л хувцас сольж өмсөөд зураг авхуулах дуртай байсан. Арван нас хүртлээ бараг тийм байсан байх. Энэ бүхэн ээжийн маань санаа байсан.
-Хүзүүний зүүлт тань танд сайхан зохижээ?
-Миний нөхөр Сийл “Валентины баяр”-аар бэлэглэсэн юм.
-Сийлийн хийж байсан хамгийн романтик үйлдлээс дурдахгүй юу?
-За байз. Нөхөр маань их романтик хүн, олон ч романтик зүйл хийж байсан. Надад түүний машины хаалга онгойлгож өгдөг зэрэг нь хамгийн их таалагддаг /инээв/. Гэхдээ мэдээж хамгийн романтик байсан нь сүй тавих үе байсан юм байна.
-Мөсөн байшинд сүй тавьсан гэж сонссон?-Тийм ээ. Уулын оройд мөсөн байшин барьсан байсан. Намайг нисдэг тэргээр уулын оройд хүргүүлж, тэнд надад гэрлэх саналаа тавьсан юм. Тэгэхэд үнэхээр бялуурмаар романтик байсан шүү.
-Та хоёр жил бүр гэрлэлтийн тангаргаа шинэчлэн тангарагладаг гэж сонссон. Энэ үнэн үү?
-Үнэн. Бид жил бүр бие биендээ яагаад хайртай, яагаад гэрлэх болсон талаар ярилцдаг. Энэ нь бидний анх гэрлэж байсан дурсамжийг эргэн сануулдаг юм.
-Та өөрийгөө ямар үед хамгийн үзэсгэлэнтэй гэж мэдэрдэг вэ?
-Бусад бүсгүйчүүдийн адил нүүрээ будуулж, үсээ засуулсныхаа дараа мэдээж өөрийгөө үзэсгэлэнтэй гэж мэдэрдэг. Түүнээс гадна гэр бүлтэйгээ байх үедээ түүнээс ч илүү сайхан болсон мэт сэтгэгдэл төрдөг шүү. Харин Сийл намайг жирэмсэн байхдаа “хөөрхөн” байсан гээд байгаа юм. Надад тэгж огт санагдаагүй. /инээв/
