Монголын Үндэсний баяр наадамтай холбоотойгоор гадаад улс орнуудын төр, засгийн удирдагчдаас Монголын ард түмэнд баярын мэнд дэвшүүлсэн цахилгаан утас манай улсын Ерөнхийлөгч, УИХ-ын дарга, Ерөнхий сайд, Гадаад харилцааны сайд нарт ирсээр байна.
Одоогоор ОХУ-ын Ерөнхийлөгч, БНХАУ-ын дарга, АНУ-ын Ерөнхийлөгч, Японы Эзэн хаан, Франц, ХБНГУ, Казахстан, Беларусь, АНЭУ-ын Ерөнхийлөгч, Кувейтын Эмир, ОХУ-ын Холбооны хурлын Холбооны зөвлөлийн дарга, Ерөнхий сайд зэрэг гадаадын 60 гаруй орны удирдагчид баярын цахилгаан утас ирүүлжээ.
Тухайлбал, БНХАУ-ын дарга Ши Жиньпин Ерөнхийлөгч Х.Баттулгад ирүүлсэн мэндчилгээндээ “Миний бие Хятад, Монголын харилцааны хөгжилд өндөр ач холбогдол өгдөг бөгөөд талууд иж бүрэн стратегийн түншлэлийн харилцааны агуулгыг тасралтгүй баяжуулж, хоёр улсын харилцан ашигтай хамтын ажиллагаанд шинэ өнгө аясыг бий болгож, хоёр улс болон хоёр улсын ард түмэнд илүү их үр өгөөжийг хүртээхийн төлөө хамтдаа зүтгэхийг хүсч байна” гэжээ.
Канадын Парламентын Нийтийн танхимын дарга Ж.Реган УИХ-ын дарга М.Энхболдод ирүүлсэн мэндчилгээндээ, хоёр орны харилцаанд чухал байр суурь эзэлдэг парламентын харилцаа нь энх тайван, хөгжил цэцэглэл зэрэг нийтлэг эрх ашгийнхаа төлөөх хамтын ажиллагааны суурь болж байдгийг тэмдэглэжээ. Дэлхийн хөл бөмбөгийн аварга шалгаруулах тэмцээнийг эх орондоо амжилттай зохион байгуулсан ОХУ-ын Ерөнхий сайд Д.Медведев манай Ерөнхий сайд У.Хүрэлсүхэд ирүүлсэн баярын цахилгаан утсандаа ОХУ, Монгол Улсын “олон талт хамтын ажиллагааг цаашид хөгжүүлэх, эрчим хүч, аж үйлдвэр, тээврийн дэд бүтэц, дэвшилтэт технологи болон бусад салбарын төслүүдийг хэрэгжүүлэх нь хоёр орны урт хугацааны ашиг сонирхолд бүрэн нийцэж байна” хэмээжээ.
Гадаад харилцааны сайд Д.Цогтбаатарт илгээсэн цахилгаандаа ОХУ-ын Гадаад хэргийн сайд С.Лавров “Орос, Монголын хооронд найрсаг харилцаа, харилцан ашигтай хамтын ажиллагааг цаашид цогцоор хөгжүүлэх нь манай орнуудын ард түмнүүдийн ашиг сонирхолд бүрэн нийцэж, бүс нутаг дахь энх тайван, аюулгүй байдлыг бэхжүүлэхэд дэмжлэг үзүүлнэ гэдэгт итгэлтэй байна” гэсэн бол БНХАУ-ын Төрийн зөвлөлийн гишүүн бөгөөд Гадаад хэргийн сайд Ван И “Миний бие хоёр улсын удирдагч нарын хүрсэн чухал тохиролцоог бүх талаар хэрэгжүүлж, иж бүрэн стратегийн түншлэлийн харилцааны хөгжилд түлхэц өгөхийн төлөө Тантай хамтдаа хичээл зүтгэл гаргахад бэлэн” гэжээ. АНУ-ын Төрийн нарийн бичгийн дарга М.Помпео “Монгол бол дэлхий дахинд үлгэр дуурайл болж байгаа орон бөгөөд Америкийн зүгээс тус улстай байгуулсан түншлэлээ улам бүр бэхжүүлэхийн төлөө байна” гэдгээ тус тус онцлон тэмдэглэжээ.
Р.Хишигжаргал
