Манай улс БНСУ-ын Кошин их сургуулийн Госпел эмнэлэгтэй хамтран Төрийн тусгай албан хаагчдын нэгдсэн эмнэлэгтээ Телемедициний төвтэй боллоо. Нээлтийн арга хэмжээг өнөөдөр зохион байгуулж байна.

Тодруулбал: Төрийн тусгай албан хаагчдын нэгдсэн эмнэлэг, БНСУ-ын Кошин их сургуулийн Госпел эмнэлэгтэй эрүүл мэндийн тусламж, үйлчилгээ, сургалт, судалгаа хийх, эрдэм шинжилгээний хурал хамтран зохион байгуулах зорилгоор өмнөх оны зургадугаар сарын 20-нд хамтын ажиллагааны гэрээ байгуулжээ.

 Телемедициний төв нээгдсэнээр эмч, мэргэжилтнүүд харилцан туршлага солилцох, Монгол Улсад эмчлэгдэх боломжгүй үйлчлүүлэгчийг тус төвөөр дамжуулан БНСУ-д эмчлүүлэх,  БНСУ-д эмчлүүлэх хүсэлтэй үйлчлүүлэгчдэд эмнэлгийн тусламж, үйлчилгээ үзүүлэх, мөн үйлчлүүлэгчийг эмчилгээний дараах хяналт, мэдээлэл үйлчилгээгээр хангах боломжтой болж байна.

Тус төвийн нээлтийн үйл ажиллагаанд ХЗДХЯ-ны төлөөлөл, ЭМЯ-ны төлөөлөл, Төрийн тусгай албан хаагчдын нэгдсэн эмнэлгийн удирдлагаболон БНСУ-ын Кошин их сургуулийн нэгдсэн эмнэлгийн төлөөлөл, Бусан хотын олон улсын эрүүл мэндийн хамтын ажиллагааны хэлтсийн төлөөлөл нар оролцлоо.

Мөн ирэх есдүгээр сарын 25-ны өдрөөс эхлэн гурван хоногийн хугацаанд Бусан хотын 60 орчим хүний бүрэлдэхүүнтэй эмч нарын баг Төрийн тусгай албан хаагчдын нэгдсэн эмнэлэг дээр байрлаж, иргэдэд үнэ төлбөргүй үзлэг, оношлогоо хийж үйлчлэхээр болжээ.

Б.Цэрэнлхам