Стартап Маркетинг Спэйс төвөөс зохион байгуулж буй Шилдэг гарааны бизнес эрхлэгчдийг дэмжих Seedstars World олон улсын тэмцээн Улаанбаатар хотноо наймдугаар сарын 16-18-нд зохион байгуулагдах гэж байна. 
 

Энэ наймдугаар сард Монголын хамгийн шилдэг 10 хүртэлх гарааны бизнес эрхлэгчид өрсөлдөн, шилдгээр шалгарсан оролцогч Seedstars Summit олон улсын чуулганд эх орноо төлөөлж, нэг сая ам.долларын хөрөнгө оруулалт авахаар өрсөлдөх юм байна.

Дэлхий дахинаа хөгжиж буй орнуудын гарааны бизнес эрхлэгчдийг дэмжин ажилладаг уг тэмцээн Монгол улсад хоёр дахь удаагаа зохион байгуулагдах гэж байгаа аж.
Энэ жил нийтдээ 65 оронд зохион байгуулагдаж ялагчиддаа нэг сая ам.долларын хөрөнгө оруулалт авах эрх болон дэлхийн нэр нөлөө бүхий хөрөнгө оруулагчид зөвлөхүүдтэй холбогдох боломжийг олгож байгаа юм. Өнөөг хүртэл тус уралдааны оролцогчид нийт 61 сая ам долларын хөрөнгө оруулалт босгож дэлхий даяар 800 гаруй хүнийг ажлын байраар хангаад байгаа аж.

Seedstars Ulaanbaatar-д оролцох гарааны бизнес нь байгуулагдаад хоёр жилээс хэтрээгүй, MVP (Minimial Viable Product) буюу Бүтээгдэхүүний туршилтын хувилбараа боловсруулсан, ашгийн төлөө бизнес санаа байх юм. Түүнээс гадна тухайн бизнес нь зөвхөн дотооддоо төдийгүй гадаад зах зээлд ч тэлж ажиллах боломжтой байх нь Seedstars World тэмцээний хувьд томоохон давуу тал болох юм байна.

Тус тэмцээн нь олон нийтэд нээлттэй явагдах юм. Тэмцээнийг үзэхийг хүсвэл https://seedsta.rs/ulaan18_attend хаягаар орж Attendees Registration –ээр бүртгүүлэх юм байна.

Харин тэмцээнд оролцогч стартапууд https://seedsta.rs/ulaan18_apply хаягаар бүртгүүлнэ.
Тэмцээний талаарх дэлгэрэнгүй мэдээллийг 7577-6777 утсанд хандан лавлах юм байна.

Л.Сайнбаяр