Өнгөрсөн лхагва гаригт авто краны трос тасарснаас үүдэн хүний амь эрсэдсэн хэрэг гарсан. Энэ тухай болон бусад холбогдох ослын талаар барилгын гүйцэтгэгч компаниуд өнөөдөр мэдээлэл хийлээ.
“Шинэ холд” ХХК-ий захирал н.Баярмөнх “Бид бүхэн барилгын салбарын тухай нийгэмд үүсээд буй ташаа мэдээллийг засч заларуулахаар “Хурд” групптэй хамтран ажилладаг гүйцэтгэгч компаниудын захирлууд оролцож байна. Саяхан аж үйлдвэрийн хашаанд эрдэнэт хүмүүний амь эрсэдсэн хэрэг гарсан. Талийгаач болон түүний ар гэрийнхэнд гүн эмгэнэл илэрхийлж байна” гэв.
Дашрамд дурдахад талийгаач хүү 17 настай байсан ба тус барилгын компаний хүний нөөцөөс насны тухайд нь тодруулалгүй хайхрамжгүй хандсан гэсэн мэдээлэл өглөө.
Мөн “Шинэ мөнх дөл” ХХК захирал Б.Баттөр “2013 онд манай барилгын талбайд гэнэтийн осолж болж кранд цохиулан хүзүүн тус газраа гэмтэл аван бэртэж байсан тохиолдол гарч байсан. Тухайн үед их хүнд гэмтэл байсан юм. Мөн хуулийн хариуцлагаа миний бие болон манай байгуулага хүлээсэн. Уг хэрэгт “Хурд” группийг буруутан болгож, өдийг хүртэл хэвлэлээр мэдээлэх нь буруу ташаа ойлголт юм. Угтаа бол зөвхөн манай компанид үүссэн хэрэг. Хууль хяналтын байгууллагаас ч хариуцлага оногдуулсан. Ажил олгогч байгууллагынхаа нэр хүндийг сэвтээсэнд харамсаж, осолд өртсөн ажилтны ар гэрийхнээс албан ёсоор уучлалт гуйя” гэлээ.
Түүнчлэн хэд хэдэн гүйцэтгэгч компаниуд аюулгүй байдлаа хангаж ажиллаагүйгээс осол, эндэгдэл гарсан хэмээн талийгаачийн ар гэрийнхэн болон ард иргэдээс уучлал хүссэн юм.
Эдгээр барилгын компаниуд “Хурд” группийн барилгын төслүүдтэй хамтран, гүйцэтгэгч байгууллагаар ажилладаг аж. Гүйцэтгэгч байгууллагууд өөрсдөө аюулгүй ажиллагаа болон аливаа осол эндэгдлийг хариуцдаг талаар дурдаж байв. Өөрөөр хэлбэл хэвлэл мэдээллийн хэрэгслээр “Хурд” группийн талаар ташаа мэдээлэл гараад байгаа учраас тухайн мэдээллийг засч өөрсдийн буруугаа хүлээж байна гэж ярьсан юм.
Барилгын салбарт 2012-2017 оны хооронд үйлдвэрлэлийн 1058 осол гарч 1088 хүн өртсөн гэсэн судалгаа байдаг байна. Харин 2017 онд 13 осол гарч, үүнээс 10 хүн нь амь насаа алджээ.
Б.Лхам
