Монголбанкнаас хоёр дахь жилдээ банкны салбарын удирдах ажилтнуудын зөвлөгөөнийг эхлүүллээ. Энэ удаагийн Хангайн бүсийн зөвлөгөөн Хөвсгөл аймгийн төв Мөрөн суманд энэ сарын 9-11-ний өдрүүдэд зохион байгуулагдсан байна.

Зөвлөгөөнийг нээж Монголбанкны Дэд Ерөнхийлөгч үг хэлж, Нөөцийн удирдлага санхүүгийн зах зээлийн газар, Төлбөр тооцооны газар, Тамгын газрын удирдлагууд болон Хяналт шалгалтын газар, Хууль эрх зүйн газар, Дотоод аудитын газар, ОНБМТ-ийн төлөөллүүд “Банкны салбарын хууль эрх зүйн шинэчлэл”, "Үндэсний төлбөрийн системийн тухай хууль”, “Мөнгөний үзүүлэлтүүд ба зээлийн хүү”, “Мөнгөний бодлогын шийдвэрүүд ба хэрэгжилт”, “Орон нутаг дахь банкны нэгжид зайнаас хяналт тавих аргачлал”, “Эх орны алтаа Эрдэнэсийн сандаа аяны хэрэгжилт” зэрэг сэдвээр танилцуулга хийж, мөн өргөн хүрээнд хэлэлцүүлэг өрнүүлжээ.

Тус бүсийн зөвлөгөөнд Дархан-Уул, Орхон, Өвөрхангай, Архангай, Хөвсгөл, Баянхонгор аймаг дахь Монголбанкны хэлтэс, салбаруудын захирал, ажилтнууд болон орон нутаг дахь арилжааны банкны салбаруудын удирдах ажилтнууд оролцсон байна.

Мөн энэ үеэр Монголбанкны Дэд ерөнхийлөгч Б.Лхагвасүрэн Хөвсгөл аймгийн Засаг даргын орлогч Ц.Баттогтох болон Иргэдийн төлөөлөгчдийн хурлын дарга Л.Төмөрбаатар нартай уулзалт хийж санал бодлоо солилцжээ.

Р.Хишигжаргал