НИТХ-ын Тэргүүлэгчид өнөөдөр Нийслэлийн Сонгуулийн ерөнхий хороонд өөрчлөлт оруулах тухай, Үндэсний цэцэрлэгт хүрээлэнд хийсэн шалгалтын тухай болон Ноогдол ашгийн хувь хэмжээг тогтоох тухай асуудлыг хэлэлцэхээр ээлжит хурлаа зарласан.
Хуралдаанд Үндэсний цэцэрлэгт хүрээлэнгийн дарга Монгол улсад одоогоор байхгүй тул Үндэсний цэцэрлэгт хүрээлэнд хийсэн шалгалтын тухай асуудлыг дараагийн хуралдаанаар авч хэлэлцэхээр болсон юм.
НИТХ-ын гишүүн У.Ганбаатар “2016 оны долдугаар сарын 29-ны өдрийн НИТХ-ын Тэргүүлэгчдийн 04дугаар тоот тогтоолоор Нийслэлийн сонгуулийн ерөнхий хороо байгуулагдсан байдаг. Үүгээр нийт есөн гишүүн томилогдсон. Үүнээс Нийслэлийн сонгуулийн ерөнхий хорооны нарийн бичиг дарга бөгөөд нийслэлийн өмчийн харилцааны дарга асан Т.Батдорж, Нийслэлийн сонгуулийн ерөнхий хорооны гишүүн Б.Мөнхцэцэг нар төрийн албанаас чөлөөлөгдсөн тул сонгуулийн хуулийн дагуу төрийн албаны төлөөллөөс сонгуулийн хороонд нөхөн томилж өгнө үү” хэмээн НИТХ-ын Тэргүүлэгч нарт хүсэлт гаргалаа.
Хүсэлт гаргасан учир нь Нийслэлийн нөхөн сонгууль ирэх аравдугаар сарын долооны өдөр Багахангай дүүрэгт, дахин сонгууль аравдугаар сарын 23-ны өдөр Баянзүрх дүүргийн 10,19 дүгээр тойрогт явагдахаар төлөвлөгдөж байгаа тул сонгуулийн хуулийн дагуу 45 хоногоос доошгүй хугацаанд сонгуулийн хорооны бүрэлдэхүүнийг баталгаажуулах шаардлагатай байдаг байна.
НИТХ-ын Тэргүүлэгчдийн хуралдаанаар Нарийн бичгийн даргаар нийслэлийн Сүхбаатар дүүргийн тамгын газрын хуульзүйн тасгийн дарга П.Булганмааг, Нийслэлийн Баянгол дүүргийн Засаг даргын тамгын газрын хуулийн тасгийн газрын дарга П. Батбаярыг сонгуулийн ерөнхий хорооны гишүүнээр нөхөн томиллоо.
Энэ үеэр НИТХ-ын тэргүүлэгчдийн дарга С.Амарсайхан Нийслэлийн сонгуулийн хорооны дарга Ү.Ганболдод “Ирэх аравдугаар сард болох нөхөн сонгуулийг ил тод, нээлттэй, хуулийн хүрээнд шударга, өндөр зохион байгуулалттай явуулахыг үүрэг болголоо. Хоёдугаар асуудал болох Ноогдол ашгийн хувь хэмжээг тогтоох тухай асуудлаар Нийслэлийн өмчийн харилцааны дарга Б.Однасан танилцуулсан юм.
Тэрээр “Нийслэлийн хэмжээнд 2017 онд 32 орон нутгийн өмчит үйлдвэрийн газар үйл ажиллагаа явуулснаас 20 орон нутгийн өмчит аж ахуйн тооцоот газар, 12 төсөвт үйлчилгээний газар үйл ажиллагаа явууллаа. 2017 онд үйл ажиллагаа явуулсан 32 орон нутгийн өмчит аж ахуйн үйлдвэрийн газар 246.4 тэрбум төгрөгийн орлого олж 260.6 тэрбум төгрөгийн зардал гарган 16.2 тэрбум төгрөгийн алдагдалтай ажилсан байна” гэлээ.
Р.Хишигжаргал