Архангай аймгийн Засаг даргын долдугаар сарын 24-ний өдрийн 03 дугаар аймгийн өвөлжилтийн бэлтгэл хангах албан даалгавар гарлаа. Энэ жил Архангай аймгийн 19 сум тус бүр сумынхаа аюулгүй нөөцөд 50 тонн өвс, 30 тонн гар тэжээл бэлтгэнэ. Харин малчдын түвшинд сум тус бүр 3000-5500 тонн өвс, 40-90 тонн гар тэжээл бэлтгэх юм.

Өөрөөр хэлбэл, сумд энэ намар нийт 80,000 тонн өвс, 1300 тонн гар тэжээл бэлтгэнэ. Аймгийн нөөцөд 450 тонн өвс, 150 тонн гар тэжээл бэлтгэх юм. Аймгийн аюулгүй нөөцөд 33 албан газар, байгууллагууд ажиллаж байгаа хүнийхээ тооноос хамааран 500 кг-аас 6600 кг өвсийг бэлтгэж өгөхөөр тооцоолж албан даалгаварт хавсаргажээ.

Аймгийн өвөлжилтийн бэлтгэл ажлыг хангах, Засгийн газрын долдугаар сарын 4-ний өдрийн 218 дугаар тогтоолыг хэрэгжүүлэх зорилгоор сумдын Засаг дарга, албан байгууллага, аж ахуйн нэгжийн дарга, захирал нарт дээрх албан даалгаврыг хүргүүлсэн байна. Албан даалгавар нь аймгийн Хүнс, хөдөө аж ахуй, сум, багийн Засаг дарга, малчид, мал бүхий иргэд, төв, суурийн газрын өвөлжилтийн бэлтгэлийг хангах гэсэн дөрвөн чиглэлээр гаржээ.