УИХ-ын гишүүн асан Д.Гантулга гэмт хэрэгт холбогдож, өөрийн хүсэлтээр бүрэн эрхээсээ татгалзсан билээ. Харин орны хүнийг сонгох нөхөн сонгууль аравдугаар сарын 7-ны өдөр болохоор товлогдсон.  Ингэснээр удаан хугацаанд хоосон явсан суудал эзэнтэй болох юм.

-Нөхөн сонгууль болох 42 дугаар тойрогт Хэнтий аймгийн Хэрлэн, Мөрөн, Жаргалтхаан зэрэг сум багтдаг байна. Тус гурван сум 27052  хүн амтай.  Үүнээс сонгууль өгөх насны 17345 иргэн байна. Өмнө нь 12317 сонгогч санал хураалтад оролцож байжээ. 

-2016 оны УИХ-ын сонгууль АН-аас Ж.Оюунбаатар, МАН-аас Д.Гантулга, МАХН-аас Б.Одхүү нар нэр дэвшиж байсан. Ж.Оюунбаатар 5426 буюу нийт сонгогчдын 44,1 хувь, Д.Гантулга 5841 буюу 47,4 хувь, Б.Одхүү 1050 буюу 8,5 хувийн саналыг тус тус авч байв.

-Нөхөн сонгуульд оролцох намууд энэ сарын 8-ны өдрөөс өмнө материалаа бүрдүүлэн хүсэлт гаргаж, Сонгуулийн ерөнхий хороо энэ сарын 12-ны дотор  бүртгүүлсэн нам, эвслийн материалтай танилцаж батламж өгөх байсан. Харин нөхөн сонгуульд оролцох хүсэлтэй 15 нам, эвсэл Сонгуулийн ерөнхий хороонд материалаа бүрдүүлэн  хүсэлт гаргаж өгснөөс 14 намд батламж гардуулан өгөөд байна. Тодруулбал, Монгол Ардын Хувьсгалт Нам, Хөдөлмөрийн Үндэсний Нам, Ардчилсан Нам, Дэлхийн Монголчууд Нам, Үнэн ба Зөв Нам, Монгол Ардын Нам, Монголын Ногоон Нам, Эрх Чөлөөг Хэрэгжүүлэгч Нам, Монгол Үндэсний Ардчилсан Нам, Зон Олны Нам, Монгол Консерватив Нам, Иргэний Зориг-Ногоон Нам, Ард Түмнээ Хайрлая Нам, Бүгд Найрамдах Нам зэрэг намууд батламжаа гардан авсан юм.

-42 дугаар тойрогт өрсөлдөх батламж авсан нам, эвслүүд энэ сарын 31-ээс ирэх сарын 4-ны өдрийг хүртэлх хугацаанд хурлаа хийж, нэр дэвшигчдэдээ сонгох ёстой. Одоогоор аль намаас хэн нэр дэвших нь тодорхойгүй байгаа юм.

-Харин ирэх есдүгээр сарын 7-оос өмнө намууд нэр дэвшигчийн холбогдох материалыг бүрдүүлж, Сонгуулийн ерөнхий хороонд бүртгүүлнэ.

Мөн энэ сарын 31-ээс есдүгээр сарын 6-ны өдрийг хүртэлх хугацаанд нэр дэвшигчид тухай тойргийн 801 хүний гарын үсгийг цуглуулж, Сонгуулийн ерөнхий хороонд хүргүүлэх ёстой.

-Нэр дэвших гишүүнийхээ материалыг ирүүлсэн нам, эвслүүдэд есдүгээр сарын 14-ны өдрийн дотор Сонгуулийн ерөнхий хорооноо хуралдаж, нэр дэвшигчийн үнэмлэх олгох юм.

-Хэнтий аймгийн 2016 оны УИХ-ын сонгуульд 340 сая төгрөг зарцуулж байснаас 42 дугаар тойрогт 92 сая төгрөгийг төсөвлөсөн байдаг. Харин энэ удаагийн УИХ-ын гишүүнийг Нөхөн сонгох Хэнтийн 42 дугаар сонгуульд 228.1 сая төгрөгийг зарцуулахаар төсөвлөжээ.

Б.Лхам