НИТХ, Нийслэлийн Захирагчийн ажлын албадаас “Нийслэлийн худалдаа үйлчилгээний нийтлэг журам”-ыг шинэчлэн боловсруулж батлуулахтай холбоотойгоор иргэд, аж ахуй нэгж, худалдаа эрхлэгчдийн саналыг тусгахаар хэлэлцүүлэг зохион байгууллаа.
Төр захиргааны байгууллага, иргэд, худалдаачдын дунд зөрчил маргаан үүсгэдэг нийтийн эзэмшлийн гудамж, талбай, автобусны буудал дээр зөвшөөрөлгүй байршуулан үйл ажиллагаа явуулж байгаа ТҮЦ, гудамж талбайд ил задгай худалдаа эрхэлж байгаа иргэдийн асуудлыг шийдвэрлэхээр ажиллаж байгаа аж. Түүнчлэн хүчин төгөлдөр мөрдөгдөж байгаа Журмыг шинэчилснээр эрхзүйн харилцаанд оролцогч талуудын эрх ашиг, хуулийн хэрэгжилтийг хангаж, худалдаа үйлчилгээ эрхлэх нөхцөл тодорхой болно гэж албаныхан үзэж байна.
Хэлэлцүүлгийн үеэр НИТХ-ын Тэргүүлэгчдийн нарийн бичгийн дарга бөгөөд Ажлын албаны дарга Б.Батбямба “Бид сүүлийн хоёр сарын хугацаанд иргэдийг бухимдуулах асуудлын нэг болсон ил задгай хоол хүнс борлуулах, ТҮЦ-ний асуудлыг шийдвэрлэхэд гарц гаргалгаа хайлаа. Энэ хэлэлцүүлэгт төр, иргэдийн саналыг сонсох зайлшгүй шаардлагатай юм. Түргэн үйлчилгээний цэг эрхлэгчдийн бизнесийг хааж боож, өөр хэн нэгний бизнесийг дэмжээгүй. Одоо мөрдөгдөж буй журмын зарим зүйл заалт захиргааны хуультай зөрчилдөж байгаа тул эрхзүйн хэм хэмжээг илүү боловсронгуй болгох шаардлага бий болсон” хэмээн тайлбарлав.
“Нийслэлийн худалдаа үйлчилгээний нийтлэг журам”-нд тав дахь удаагаа нэмэлт өөрчлөлт оруулж байгаа бөгөөд өмнөх оны сүүлээс эхлэн шинэчлэн боловсруулж эхэлжээ. Өмнөх журам дээр худалдаа үйлчилгээ эрхлэх чиг үүрэг ороогүй байсныг зааглаж худалдаа, үйлчилгээ эрхлэхэд тавигдах шаардлага болон бүрдүүлэх материалын журмыг тодорхой зааснаараа онцлогтой аж. Мөн хэлэлцүүлгийн үеээр ТҮЦ, ил задгай худалдаанд хийсэн хяналт шалгалтын мэдээллийг Нийслэлийн мэргэжлийн хяналтын газрын дэд дарга С.Даваасүрэн танилцуулсан юм.
Тэрбээр “Холбогдох хуулийн дагуу 17 удаа хяналт шалгалтын үйл ажиллагаа явууллаа. Илэрсэн зөрчлөөс дурьдвал ТҮЦ дээр хугацаа хэтэрсэн хүнсний бүтээгдхүүн болон тамхи ширхэглэж зарах зөрчил бүртгэгдсэн. Хуулийн хэрэгжилтийг хангаж ажиллахыг шаардах хуудас хүргүүлсэн. Нийслэлд үйл ажиллагаа явуулдаг ТҮЦ стандартын шаардлага хангадаггүй. Өндөг чанах, түргэн муудах бүтээгдэхүүн зардаг гэх мэтчилэн зөрчил гаргасаар байна. Хяналт шалгалтын хүрээнд таслах зогсоох арга хэмжээ авч ажиллаж байна” гэв.
Ил задгай болон ТҮЦ-ийн худалдаа үйлчилгээ хүүхдийн эрүүл мэнд, аюулгүй байдалд хэрхэн нөлөөлж байгаа талаад Нийслэлийн хүүхэд гэр бүл хөгжлийн газрын Гэр бүл, хүүхэд хамгаалалын хэлтсийн мэргэжилтэн Х.Одонтуяа “Хүүхдийн аюулгүй байдлыг хамгаалах нь бидний үүрэг. Худалдаа үйлчилгээ болон жагсаал цуглааны явцад хүүхдийг хамгаалах тухай хуульчилсан байдаг. Чанартай хоол хүнсээр хангагдаж өссөн хүүхэд өв тэгш хөгждөг. Манай орны хувьд хүүхдийн таргалалтын асуудал тулгарч байна. Таван хүүхдийн нэг нь таргалалттай гэсэн судалгаа бий. Таргалалтаас үүдэлтэй олон сөрөг нөлөө бий болдог. Ерөнхий боловсролын сургуулийн орчинд ундаа, чипс, пирошки борлуулагддаг. Сурагчдын өвчлөлийн гол үндэс нь хоолны хордлого байна. Хүүхдүүдэд эрүүл чанартай хүнс худалдаалах хэрэгтэй” гэж ярьсан юм.
Б.Лхам
