“Хятад орныг танин мэдэх” ӨМӨЗО-ны соёлын өдрүүд ирэх сарын 4-ний өдрөөс 8-ны өдөр хүртэл зохион байгуулагдахаар болжээ. Өдөрлөгийн талаар ӨМӨЗО-ны Хэвлэл мэдээллийн албаны дарга Хан Юүн Шян, БСШУЯ-ны Соёл, урлагийн бодлогын газрын дарга Б.Сэргэлэн, МСНЭ-ийн Ерөнхийлөгч Х.Мандахбаяр, БНХАУ-аас Монгол Улсад суух Элчин сайдын яамны Соёлын төлөөлөгч Ли Вай нар мэдээлэл хийлээ.
Өмнө нь ӨМӨЗО-ны соёлын өдрүүдийн хүрээнд тус арга хэмжээ зохион байгуулагддаг байсан бол Хятадын шинэ Засгийн газраас соёл болон аялал жуулчлалын салбарыг нэг яам болгосноор энэ жилээс соёл, аялал жуулчлалын өдөрлөгийг хамтатгаж хийж байгаа аж.
Энэ талаар МСНЭ-ийн Ерөнхийлөгч Х.Мандахбаяр “Соёлын өдрүүд нь бидэнд их боломж авчирч байна. Тухайн орны ядуурлыг бууруулсан туршлага, соёлын арга хэмжээнүүдийн ололт амжилт, техник технологи гээд олон зүйлүүдийг хэрэгтэй салбарт нь хүргэх боломж гарч буй учраас хэвлэл мэдээллийн салбарынхан бидний хувьд уг арга хэмжээг түгээх боломж гарч байна гэж үзэж байна. Тус арга хэмжээ нь ес дэх удаагаа зохион байгуулагдаж байна. Нийт 158 орчим хүн хоёр улсаас оролцож байгаа юм. Энэ нь уламжлалт арга хэмжээ бөгөөд Монгол, Хяталын эв найрамдалт, хамтын ажиллагааны харилцаанд томоохон байр суурь эзэлдэг. Бусад салбарынхаа үйл ажиллалааг дэмждэг арга хэмжээ юм” хэмээн тус үйл ажиллагааны талаар өөрийн санал бодлоо илэрхийлж байлаа.
Дээрх өдөрлөгийн гол арга хэмжээ нь аялал жуулчлал, үндэсний хувцас, ӨМӨЗО-ны хоолны амт танилцуулах зэрэг юм. Түүнчлэн энэ оноос эхлэн сургууль хоорондын солилцоо буюу хамтарсан үзэсгэлэн, шинжлэх ухааны инновацийн сэдэвт лекц уншигдахаар болжээ.
Мөн ирэх сарын 5-аас 7-ны өдрүүдэд үзүүлэх тоглолт сонирхуулах юм. Үүнд “Найрамдлын хотын дуулал”, “Цагаан могойн домог” зэрэг жүжиг Соёлын төв өргөөнд тоглогдоно. Түүнчлэн уг өдөрлөгөөр Хятадын хамгийн их ашиг орлоготой шилдэг 10 киног бүх кино театруудаар үзүүлэхээр болсон байна.
ӨМӨЗО-ны Хэвлэл мэдээллийн албаны дарга Хан Юүн Шян “Хоёр орны харилцаа улам өргөжин тэлж, цаашид соёлоор ойлголцох, хоёр орны соёлыг гүнзгий мэдэрч ард түмний нөхөрлөлийг бий болгох үүднээс уг арга хэмжээг зохион байгуулж байна. Уг арга хэмжээгээр дамжин харилцан хөгжих, харилцан ашигтай байх, бие биедээ элэгсэг дотно найрсайг байх зэрэгт соёлын арга хэмжээний үр дүн өгнө гэж найдаж байна” хэмээн онцлон ярьлаа.
Б.Лхам
