Хөдөлмөр Нийгмийн хамгааллын сайдын 2018 оны 07 дугаар сарын 25-ны өдрийн А/206 тоот тушаалаар батлагдсан “Зохион байгуулалттай ажлын байр туршилтын төсөл”-ийг хэрэгжүүлэхээр Дархан-Уул аймагт төслийн багуудыг Шарын гол, Хонгор сум, Дархан сумын 1-8, Малчин, Өргөө багууд, 9-16 дугаар багт тус бүр 6-7 хүний бүрэлдэхүүнтэй нийт 24 гишүүнтэйгээр байгуулан үйл ажиллагааг эхлүүллээ.

Төсөл хэрэгжүүлэгч багийнхан тус төслийг хэрэгжүүлэх, зохион байгуулах удирдамжид заасны дагуу сумын хэмжээнд нөөцийн болон шинээр эзэмших бэлчээр өвөлжөө, хаваржаа, намаржааны хашаа, хороо барих, худаг ус, үер усны суваг шуудуу гаргах, хөнөөлт хортон шавьж, малын сэг зэм устгах, өвс тэжээл бэлтгэх, өвөлжилт хүндэрсэн үед малчдад өвс тэжээл хүргэх, цас арилгах, багийн хэмжээнд хүүхдийн болон спортын талбай, нийтийн эзэмшлийн талбай, явган зам зүлэг сүүдрэвчний хог хаягдал цэвэрлэх, хур хог үүсэхээс сэргийлэх, эвдрэлийг засах, нэгдсэн журмаар тохижилтын ажил хийх зэрэг ажлуудыг жилийн турш хийж гүйцэтгэхээр ажиллаж байна.

Төслийг хэрэгжүүлэгч нар нь Хөдөлмөр эрхлэлтийн байгууллагад ажил хайгчаар бүртгэлтэй иргэд бөгөөд тэдний орлогыг нэмэгдүүлэх, эрүүл мэндийн даатгалд хамруулах, сайн дурын даатгал төлөх боломжийг бүрдүүлэх, тэдний ажиллах нөхцлийг бүрдүүлэн гурав хүртэлх сая төгрөгний буцалтгүй дэмжлэгээр шаардлагатай хөдөлмөрийн багаж хэрэгсэлээр хангаж тогтвортой ажиллуулах, цаашид багийн гишүүдийг нөхөрлөл, хоршоо байгуулан ажиллахад нь дэмжлэг үзүүлэн ажиллах зорилготой юм байна.

Төслийн багийнхан нийт 36 сая төгрөгийн батлагдсан төсөвтэйгөөр ажиллах бөгөөд гишүүдэд Хөдөлмөрийн аюулгүй байдал, эрүүл ахуйн сургалтыг өнөөдөр хийж, зааварчилгаа мэдээлэл өглөө.

Р.Хишигжаргал