Улсын хэмжээнд үйл ажиллагаа явуулж буй Арьс гоо заслын эмнэлгүүдэд урьдчилан сэргийлэх хяналт, гоёлын гоо сайхны газруудад тандалт судалгаа хийсэн дүнг хэлэлцсэн байна.

Хяналт шалгалт, тандалт судалгааг Мэргэжлийн хяналтын ерөнхий газар, Эрүүл мэндийн яам, Нийгмийн эрүүл мэндийн үндэсний төв, Арьсны өвчин судлалын үндэсний төв, Халдварт өвчин судлалын үндэсний төв, Нийслэлийн эрүүл мэндийн газар, Нийслэлийн мэргэжлийн хяналтын газрын  улсын байцаагч, мэргэжилтэн, эмч, судлаачид хамтран гүйцэтгэжээ.

Уг хяналт шалгалт, тандалт судалгаа нь “Элэг бүтэн Монгол” үндэсний хөтөлбөрийн гуравдугаар зүйлийн 3.1.2.3, 3.1.2.5, 3.1.2.6 дахь заалтуудын хэрэгжилтийг хангуулах, элэгний В, С вирус, ДОХ зэрэг цусаар дамжих халдвараас урьдчилан сэргийлэх, эрсдэлийг үнэлэх, цаашид авч хэрэгжүүлэх арга хэмжээ, бодлогыг тодорхойлох зорилготой аж.

Судалгаанд аймаг, нийслэлд үйл ажиллагаа явуулж буй арьс, гоо заслын 48 эмнэлэг, гоёлын гоо сайхны 186 газар хамрагдсан байна.

Хяналт шалгалтыг нян судлалын шинжилгээ, физик хэмжилттэй хийсэн ба шинжилгээгээр зарим эмнэлэг, гоо сайхны газрууд эрүүл ахуй, халдвар хамгааллын дэглэмийн шаардлагыг хангахгүй дүнтэй гарчээ.

Иймээс цаашид эрх зүйн орчныг боловсронгуй болгох, эмнэлгүүдийн тусгай зөвшөөрлийн нөхцөл шаардлагыг хангуулах, хяналт шалгалтыг чангатгах, арьс, гоо заслын эмнэлэг, гоёлын гоо сайхны газруудын стандартыг яаралтай өөрчилж, тавигдах шаардлагыг тодорхой болгох, эмч, гоо сайханчдын мэдлэг мэргэжлийг дээшлүүлэх зэрэг асуудлыг нэн түрүүнд шийдвэрлэхээр болжээ.

Б.Лхам