Хөвсгөл аймаг дахь “Шүүхийн шийдвэр гүйцэтгэх газар-443” нээлттэй хорих ангийн эзэмшлийн MV-1356 ашиглалтын лиценз бүхий нүүрсний ил уурхайн үйл ажиллагаатай аймгийн Засаг дарга газар дээр нь танилцаж тодорхойгүй хугацаагаар үйл ажиллагааг зогсоохыг холбогдох албан тушаалтнуудад үүрэг болголоо.

Хөвсгөл аймаг дахь “шүүхийн шийдвэр гүйцэтгэх газар-443” нээлттэй хорих анги  нь  “Пи Эс Эс Ти” ХХК-тай 2018 оны 03 дугаар сарын 19-ны өдөр 2018/05 дугаар бүхий “Хөрс хуулалт болон нүүрс олборлолтын ажлын гэрээ”-г байгуулсан ба улмаар нүүрс тээвэрлэх зөвшөөрлийг аймгийн Засаг даргаас хүссэнд, боломжгүй гэж хариу өгсөн байна.

Мөн тус аймгийн Засаг дарга энэ уурхайн нөөцийг Могойн голоос нүүрс тээвэрлэх боломжгүй цаг агаар хүндэрсэн тохиолдолд авч ашиглах, аймаг орон нутгийн хэрэгцээг хангахаас өөр зорилгоор  гадагш тээвэрлэхийг зөвшөөрөхгүй гэв.

“Хөрс хуулалт болон нүүрс олборлолтын ажлын гэрээ” нь холбогдох хууль тогтоомжид нийцэж байгаа эсэхийг холбогдох газарт хандаж аймгийн Засаг дарга дүгнэлт шийдвэр гаргахаар боллоо.

Мөн энэ үеэр Төмөртийн аманд байрлах “Блек рок” ХХК-ний хайгуулын болон ашиглалтын талбайгаар орсон ба тус талбайд 180 гаруй байгалийн үл хөдлөх дурсгалт газар байрлаж байгаа тул мэргэжлийн байгууллагуудаар хууль ёсны дүгнэлт гаргуулан Ашигт малтмалын газарт санал хүргүүлэхийг холбогдох албан тушаалтнуудад үүрэг болголоо.