Орхон аймаг 15-34 насны 33000 залуучуудтай. Тэгвэл өнөөдөр тэдний хөгжил, боловсрол, эрүүл мэндийн хөгжлийн төлөө Гэр бүл, хүүхэд, залуучуудын хөгжлийн газар/ ГБХЗХГ/ нэг сарын турш олон арга хэмжээг зохион байгуулахаар нээлтээ хийлээ. Тодруулбал, Монгол Улс даяар “Залуучуудын хөгжлийг дэмжих сарын аян” нээлтээ хийсний нэг нь Орхон аймаг юм.  

Сарын аяны хүрээнд залуучуудын хөдөлмөр эрхлэлтийг дэмжих, ажлын байранд зуучлах, эрүүл мэнд, амьдрах ухааны боловсрол олгох зэрэг олон ажил зохион байгуулах ажээ.

Залуучууд халдварт бус гэхээсээ халдварт өвчин тусах эрсдэлтэй байдаг гэнэ. Учир нь тэдэнд амны хөндий болон бэлгийн замын халдварт өвчин зонхилдог гэж аймгийн ЭМГ-ын мэргэжилтэн Р.Энхбат хэллээ. Мөн залуучууд бие нь л өвдөхгүй бол эмнэлэгт ханддаггүй, урьдчилан сэргийлэх үзлэгт хамрагддаггүй байна. Иймд дээрх сарын аяны хүрээнд залуучуудад эрүүл мэндийн боловсрол олгох аж.

Харин ГБХЗХГ-ын Залуучуудын хөгжлийн төв залуучуудыг ажлын байранд зуучлахын тулд ажил олгогч эзэдтэй уулзуулах, харилцаа, хандлагын талаар сургалт зохион байгуулах гэнэ. Түүнчлэн ХХҮГ-т бүртгэлтэй байгаа ажилгүй 1500 орчим залуусыг ажилд зуучлахын тулд идэвхтэй ажиллах ажээ.

Тус газрын 2017 онд хийсэн судалгаагаар залуучуудад чөлөөт цаг өнгөрүүлэх орчин  дутмаг, ажлын байр олддоггүй, амьдрах ухааны сургалтад хамрагдахыг хүсдэг гэсэн дүн гарчээ. Үүний дагуу ажиллана гэж ГБХЗХГ-ын мэргэжилтэн Т.Бадамханд хэллээ.

Эх сурвалж: Орхон аймгийн ЗДТГ