100 гаруй мянган хүн амтай Дархан хотод “Ногоон хөгжил” олон улсын эрдэм шинжилгээний бага хурал өнөөдөр боллоо.

Хурлыг төрийн байгууллагууд их дээд сургуулиудтай хамтран явуулсан байна. 2012 онд “Ногоон эдийн засаг”, 2017 онд “Хөдөлмөрийн зах зээлийн өнөөгийн байдал: тулгамдсан асуудлууд, гарц шийдэл” сэдвийн дор олон улсын эрдэм шинжилгээний бага хурлыг явуулсан. Энэ хүрээнд улс орнууд дахь хөдөлмөрийн зах зээл, хөдөлмөр эрхлэлтийн өнөөгийн байдалд дүн шинжилгээ хийж тулгамдсан асуудлыг илрүүлэн шийдвэрлэх арга зам, боломжуудыг тодорхойлж төр, шинжлэх ухаан, боловсрол, бизнес , төрийн бус секторыг хамарсан өргөн хүрээтэй хэлэлцүүлгийг явуулж байсан. Харин өнөө жил олон улсын хурлыг “Ногоон хөгжил” сэдвийн дор явууллаа.

Энэхүү хуралд зориулан нийтдээ 20 гаруй эрдэмтэн судлаачид бүтээлээ ирүүлснээс 12 илтгэлийг өнөөдрийн хурлаар хэлэлцүүлсэн юм. Энэ жилийн олон улсын эрдэм шинжилгээний бага хуралд БНХАУ-ын Хөх хотын Тариалангийн их сургууль, ОХУ-ын Красноярский хотын улсын их сургуулийн төлөөлөл, төрийн байгууллагууд, оюутан сурагчид оролцсон юм. Илтгэлүүд ногоон бүтээмжийг хөгжүүлэх, байгаль орчны менежментийн системийн хэрэгжүүлэлт, хөдөө аж ахуйн салбарт эрчимжсэн үйлдвэрлэл хөгжүүлэхэд тулгамдаж байгаа асуудал түүнээс гарах гарцыг тусгасан илтгэлүүд танилцуулагдлаа. Хурлын үеэр танилцуулагдсан 12 илтгэлийг нэгтгэн товхимол гаргаж аймаг орон нутгийн удирдлагуудад танилцуулах улмаар бусад аймгуудад шинэ шинэлэг санааг өгөхөд ашиглах юм байна. Ингэснээр ногоон хөгжлийг нэг шатаар ахиулах боломж бүрдэнэ.