2018-2019 оны хичээлийн жил эхэлж байгаатай холбогдуулан Төв аймгийн хэмжээнд үйл ажиллагаа явуулдаг 31 ерөнхий боловсролын сургууль, 42 сургуулийн өмнөх боловсролын байгууллагуудын удирдлага, сургалтын менежер, арга зүйч, багш нарын 160 гаруй төлөөллийг оролцуулсан багш нарын бага хурлыг зохион байгуулжээ. Хурлын үйл ажиллагаанд тус аймгийн Засаг даргын орлогч Ч.Сарангэрэл, ЗДТГ-ын НБХ-ийн дарга Д.Мөнхцэцэг, БСУГ-ын дарга У.Даваажав нар оролцож өнгөрсөн хичээлийн жилийн үйл ажиллагаагаа дүгнэн, 2018-2019 оны хичээлийн жилийн зорилго, зорилтуудаа хэлэлцэн баталжээ.
Өнгөрсөн хичээлийн жилд боловсролын түвшин, судлагдахуун бүрээр сургалтын чанар, үр дүнг дээшлүүлэх зорилгоор Төв аймгийн Засаг даргын 2018 оны А/94 тоот захирамжаар “Хичээл судлагдахуун бүрээр сургалтын чанарыг дээшлүүлье-II” аяныг зарлаж, хэрэгжилт үр дүнг тооцон ажилласнаар бага, суурь, бүрэн дунд боловсролын улсын шалгалтын гүйцэтгэлийн хувь 75.93 хувьд хүрч өмнөх оноос 1.57 пунктээр, сургалтын чанар 51.86 хувьтай дүгнэгдэж өмнөх жилээс 3.93 пунктээр тус тус ахисан үзүүлэлттэй гарчээ. Тус аймгийн хэмжээнд зохион байгуулсан анги дэвших шалгалтад давхардсан тоогоор 19741 сурагч хамрагдаж сургалтын чанар 48.91 хувьтай үнэлэгдсэн нь өмнөх жилээс 0.98 пунктээр, гүйцэтгэлийн хувь 73.17 хувьд хүрсэн нь өмнөх жилээс 0.39 пунктээр, стандарт хангалт 98.63 хувьтай үнэлэгдсэн нь 5.36 пунктээр тус тус өссөн байна. мөн улсын олимпиадад амжилттай оролцох зорилгоор аймгийн хэмжээнд судлагдахуун бүрээр “Зөвлөх багш нарын баг”-ийг байгуулан ажилласны үр дүнд улсын олимпиадаас дөрвөн алт, нэг мөнгө, хоёр хүрэл медаль хүртэж, багийн төрөлд нийт найман медаль хүртсэн амжилтыг гаргасан байна.
Уг аймгийн багш нарын хурлаар БСШУСЯ-наас гаргасан “Суралцагч бүрийн сурлагын чанарт ахиц” гаргах зорилгын хүрээнд аймгийн хэмжээнд уг зорилгыг хангахад бүх шатны сургалтын байгууллага, багш, удирдах ажилтан, судлагдахуун хариуцсан мэргэжилтэн, суралцагч асран хамгаалагчийн түвшинд үүрэг оролцоо, сахилга хариуцлагаа нэмэгдүүлэн ажиллахыг онцолсон юм.
Энэ үеэр хүүхэд нэг бүрийг хөгжүүлэх үйлсэд үнэтэй хувь нэмрээ оруулж байгаа Ерөнхий боловсролын сургуулиуд, сургуулийн өмнөх боловсролын байгууллага, багш нар болон амжилттай суралцсан сурагчдад шагнал гардуулах ёслолын ажиллагаа болсон юм. “Боловсролын тэргүүний ажилтан” цол тэмдгээр таван багш, БСШУСЯ-ны “Хүндэт жуух бичиг”-ээр гурван багш, аймгийн Засаг даргын нэрэмжит “Өргөмжлөл”-өөр есөн багш, гурван сурагч шагнагдсан бол 2017-2018 оны хичээлийн жилийн “Мэргэжлийн тэргүүн” цолоор 21 багш шагнагдсан байна.
Р.Хишигжаргал
