Байгаль орчин, аялал жуулчлалын яамнаас Монгол орны ойг хамгаалах, нөхөн сэргээх, зохистой ашиглахад чиглэсэн хууль, эрхзүйн орчинг боловсронгуй болгох, тогтвортой ойн менежментийн зөв тогтолцоог бий болгоход чиглэсэн олон чухал арга хэмжээг тодорхой үе шаттайгаар хэрэгжүүлж байна. Тухайлбал,  Ойн тухай хууль, Төрөөс ойн талаар баримтлах бодлого, Ойн цэвэрлэгээ хөтөлбөр, Ногоон хэрэм үндэсний хөтөлбөр, Ойг түймрээс хамгаалах тухай Монгол улсын Засгийн газар, ОХУ-ын Засгийн газар хоорондын хэлэлцээр зэрэг эрхзүйн баримт бичгийг шинэчлэн батлуулж, ой хамгаалал, ойн нөхөн сэргээлт, зохистой ашиглалтын чиглэлээр 40 гаруй журам, дүрмийг боловсруулав. Мөн хил дамнасан түймрээс урьдчилан сэргийлэх, хамгаалах зорилгоор   Дорнод, Хэнтий, Сэлэнгэ, Увс аймгуудын ОХУ-тай хиллэх Улсын хилийн дагуу 10-40 метр өргөн, 700 гаруй км урт түймрээс хамгаалах зурвасыг байгуулав.  

Өнөөдрийн байдлаар, улсын хэмжээнд 36 сум дундын ойн анги байгуулагдан ой аж ахуйн арга хэмжээг төлөвлөх, хэрэгжүүлэх мэргэжлийн үйл ажиллагааг эрхлэн  явуулж байгаа билээ. Олон жилийн статистик бүртгэлээс үзэхэд улсын хэмжээнд  зарим жилд улсын нийт ойн сангийн 13,4 хувь хүртэлх ойн талбай ой-хээрийн  түймэрт нэрвэгдсэн судалгаа гарчээ. Манай улсын хойд бүс нутгаар байрлах сум дундын ойн ангиудын хамгаалалтад байгаа ойн сангийн   нутаг дэвсгэр нь түймрийн эрсдэлийн  I - IV зэрэглэлд багтдаг, үүнээс I зэрэг - 70 % , II зэрэг - 15 %, III зэрэг -10%, IY зэрэг -5% тус тус эзэлж байна. Иймд манай улсын хувьд ойг хамгаалах, нөхөн сэргээх, зохистой ашиглахад нөлөөлж буй хамгийн гол хүчин зүйл нь ойн түймэр болон хөнөөлт шавьжаас урьдчилан сэргийлэх, зөв хамгаалах нь тулгамдсан асуудлын нэг мөн.

Иймд өнөөдөр хүлээлгэн өгч буй энэхүү ОХУ-д үйлдвэрлэгдсэн Пургон маркийн автомашин болон түймрээс урьдчилан сэргийлэх, хамгаалах зориулалтын багаж хэрэгслүүд/үлээгч аппарат, үүргэвчит гал унтраагч, усны резинэн сав/ - нь  ойг хамгаалах, нөхөн сэргээх ажилд зарцуулагдах естой. БОАЖЯ-ны  санхүүжилтээр Сум дундын 16 ойн ангид, нийт 499.9 сая төгрөгний 16 автомашин, 87.7 сая төгрөгний 3 нэр төрлийн түймрийн багаж хэрэгсэл болон бүгд 587,7 сая төгрөгний өртөг бүхий автомашин, түймрийн багаж хэрэгслийг гардуулан өгч байна. Цаашид БОАЖЯ-аас Ойн ангиудын мэргэжлийн болон техникийн чадавхийг дээшлүүлэх арга хэмжээг  авч хэрэгжүүлэх болно.      

БОАЖЯ-ны Ойн бодлого, зохицуулалтын газар