Хүнс, хөдөө аж ахуй, хөнгөн үйлдвэрийн яам 2018-2019 оны өвөлжилт, хаваржилтын бэлтгэл ажлыг хангах зорилгоор өндөржүүлсэн бэлэн байдалд ажиллаж байгаа билээ. Өндөржүүлсэн бэлэн байдалд сахилга, хариуцлагыг чангатган ажиллаж байгаа энэ байдлыг орон нутгийн түвшинд хангуулах, аймаг, сум, баг, фермер, малчдын бүлэг, хоршоодын өвөлжилтийн бэлтгэл ажлыг эрчимжүүлж, урамшуулах зорилгоор ХХААХҮ-ийн сайдын санаачилгаар "Хадлан, тэжээл-2018" уралдааныг зарласан байна.

Уралдаанд өвөлжилтийн бэлтгэл хангахад байгалийн хадлан, гар тэжээл бэлтгэх ажлыг сайн зохион байгуулсан аймаг, сум, баг, малчдын бүлэг (5-аас дээш өрх айл нэгдсэн 2000-с дээш толгой малтай) хамрагдах боломжтой аж.

Тус уралдааны болзол биелүүлсэн шилдгээр шалгарсан аймгийг өргөмжлөл, 15 сая төгрөгөөр, сумыг өргөмжлөл, 10 сая төгрөгөөр, багийг өргөмжлөл, таван сая төгрөгөөр шагнах бол малчдын бүлэг /хоршоо/-ийг өргөмжлөл, гурван сая төгрөгийн шагналын сантай юм. Мөн фермерийг өргөмжлөл, гурван сая төгрөгөөр тус тус шагнах аж. Шагналыг аймаг, нийслэлийн Засаг даргын тамгын газраар дамжуулан олгоно гэж заажээ.