Монгол Улсын Их Хурлын 1996 оны 29 дүгээр тогтоолоор жил бүрийн наймдугаар сарын 25-ны өдрийг залуучуудын өдөр болгон баталсан. Үүний дагуу Залуучуудын нийгмийн оролцоог нэмэгдүүлэх зорилгоор жил бүрийн наймдугаар сарын 25-ны өдрөөс есдүгээр сарын 25-ны өдрийг "Залуучуудын хөгжлийн сар” болгон тэмдэглэдэг.
Энэ аян хэрэгжсэнээр залуучууд, залуучуудын иргэний нийгмийн байгууллагууд, сайн дурын бүлгүүдийн санаачлага, идэвх оролцоо, нийгэмд оруулж буй хувь нэмрийг таниулах, сурталчлах, тэмдэглэх, нийгэмд тулгамдаж буй асуудлуудыг залуучуудын хүч, идэвх оролцоо, санал санаачлагаар хэрхэн шийдвэрлэх талаар хамтдаа хэлэлцэх зэрэг чухал ач холбогдолтой аж.
Энэ аяны хүрээнд Дорноговь аймгийн Засаг даргын “Хөгжлийн төлөө хамтдаа” /2016-2020/ үйл ажиллагааны хөтөлбөрийг хэрэгжүүлж орон нутгийн хөгжил, бүтээн байгуулалтад хувь нэмрээ оруулж, үр бүтээлтэй ажиллаж буй залуучуудыг алдаршуулах зорилгоор “Түүчээ-2018” шилдэг залуу шалгаруулах арга хэмжээг зохион байгуулсан байна.
Үүнд, “Хөдөө аж ахуйн салбарын шилдэг залуу”-гаар тус аймгийн Эрдэнэ сумын Еншөөв багийн сумын сайн малчин С.Мэндбаяр, “Нийгэм улс төрийн салбарын шилдэг залуу”-гаар Сайншанд сумын гуравдугаар багийн Засаг дарга сумын ИТХ-ын төлөөлөгч Д.Төмөрбаатар, “Боловсрол соёл урлагийн салбарын шилдэг залуу ЕБ-ын тавдугаар сургуулийн дуу хөгжимийн багш МУСТА Б.Баттайван, Зам тээврийн салбарын шилдэг залуу Эн Ди Ти Кей ХХК автозамын инженер Б.Алтанцоож, Спортын салбарын шилдэг залуу Волейболын спортын мастер Б.Бат-Ууган, Эрүүл мэндийн салбарын шилдэг залуу Даланжаргалан сумын Эрүүл мэндийн төвийн их эмч Ө.Бямбажав, Бизнесийн салбарын шилдэг залуу Дэлгэр баясах зам ХХК гүйцэтгэх захирал Э.Мөнхбат нар шалгарчээ.
