Азийн Хөгжлийн банкны институт, Японы Шударга худалдааны хороо зэрэг байгууллагууд Австралийн Хэрэглэгч, Өрсөлдөөний хороотой хамтран Зүүн Өмнөд Азийн бүсийн Өрсөлдөөний байгууллагуудын удирдах ажилтнуудын туршлага хуваалцах, тулгамдаж буй асуудлаараа харилцан санал солилцох Дээд хэмжээний уулзалт Сидней хотноо зохион байгуулагджээ.

Тус үйл ажиллагаанд ШӨХТГ-ыг төлөөлөн агентлагийн дарга Б.Лхагва, Хамтын ажиллагааны газрын дарга Ш.Цэрэндулам нар оролцсон байна.

2005 оноос хойш уг уулзалт нь зохион байгуулагдаж байгаа аж. Энэ удаагийн уулзалтаар  Үндэсний хууль эрх зүй, бодлого дах өнөөгийн хөгжил, үйл явц, Үндэстэн дамнасан хэрэг маргааныг шийдвэрлэхэд хамтын ажиллагаа, Өрсөлдөөний талаар олон нийтэд зөв ойлголтыг өгөх арга хэрэгслүүд, Техник хамтын ажиллагаан дах туршлага, үнэлгээ, зохицуулалт гэсэн дөрвөн үндсэн асуудлыг хэлэлцэж, харилцан туршлага, мэдээллээсээ хуваалцсан байна.

Мөн Зүүн Өмнөд Азийн бүс нутгийн өрсөлдөөний байгууллагын үйл ажиллагаанд Шинэ Зеланд улсын Өрсөлдөөний хороо нэгдэх хүсэлтээ өгч, баталгаажуулан цаашид албан ёсоор бүсийн нийт 18 Өрсөлдөөний байгууллагууд туршлагаасаа хуваалцаж, хамтран ажиллахаар болжээ.

Түүнчлэн ирэх онд болох 15 дах удаагийн уулзалтыг Монгол Улсад зохион байгуулахаар болсон байна.

Б.Лхам