ХНХЯ-ны харъяа Хөдөлмөрийн аюулгүй байдал, эрүүл мэндийн төвөөс “Химийн хорт бодисууд, тэдгээрийн нөлөөллөөр үүсэх мэргэжлээс шалтгаалах өвчин” олон улсын семинарыг зохион байгуулж байна.

Арга хэмжээнд ХНХЯ, ЭМЯ, ХАБЭА үндэсний хороо, НДЕГ, МХЕГ, НЭМҮТ, Хор судлалын төв, мэргэжлийн өвчин судлаач эмч нар, сувилалын болон үйлдвэр уул уурхайн эмч, мэргэжилтнүүд, эрүүл ахуйн асуудал хариуцсан мэргэжилтэн, хөдөлмөрийн аюулгүй байдал, хариуцсан мэргэжилтнүүд, хөдөлмөрийн аюулгүй байдал, эрүүл ахуйн байцаагчид болон БНСУ, Нидерланд зэрэг улсын эрдэмтэн докторууд оролцож байна.  

Манай улсад мэргэжлээс шалтгаалсан өвчний 9931 тохиолдол бүртгэгдсэн байдгаас 796 тохиолдол нь мэргэжлээс шалтгаалсан химийн бодисын хордлогын оноштой гэдгийг Хөдөлмөрийн аюулгүй байдал, эрүүл мэндийн төвийн хийсэн  судалгаанд гарчээ. Уг судалгааг сүүлийн 35 жилийн хугацаанд судлан гаргажээ.

Тиймээс хорт бодисууд, тэдгээрийн нөлөөллөөр үүсэх мэргэжлээс шалтгаалах өвчин, химийн бодисын хордлого орчин үеийн оношилгоо, урьдчилан сэргийлэлт сэдвээр олон улсад болон өөрийн оронд нэвтэрч буй шинэлэг арга, техник, дэвшилтэт санааг эрдэмтэн эмч, судлаач, эрдэм шинжилгээний ажилчид, болон гадаадын зочин багш нарын судалгаанд суурилсан, шинжлэх ухааны үндэслэлтэй мэдлэг түгээхийг үүднээс тус семинарыг зохион байгуулж байгаа аж.

Түүнчлэн өнгөрсөн жил тус төв нь “Хөдөлмөрийн аюулгүй байдал, эрүүл ахуйн тулгамдсан асуудал, шийдвэрлэх арга зам” сэдэвт онол практикийн бага хурал, “Мэргэжлээс шалтгаалах өвчнөөс урьдчилан сэргийлэх” олон улсын сургалтыг зохион байгуулж байжээ.

Б.Лхам