Монголын оюутны холбооны олон нийттэй харилцах хэлтсийн дарга Э.Батжаргалтай энэ хичээлийн жилд оюутнууд хэрхэн автобусаар зорчих мөн оюутан залууст зориулсан ямар ажил хийхээр төлөвлөөд байгаа талаар ярилцлаа.

- Монголын оюутны холбоогоор сонин юу байна вэ?
- Хичээлийн жил эхлэх гээд нэлээд ажил ихтэй байна. Манай оюутны холбооны засварын ажил дуусах гээд хараахан тохижиж амжаагүй л сууж байна.

- Нийслэлд хэдэн сургуулийн хэр олон  оюутан суралцаж байна вэ?
-Нийслэлд нийт 94 их дээд сургуулийн 140-өөд мянган оюутан суралцаж байгаа гэсэн тооцоо байдаг. Жил бүр төгсөх оюутан мөн шинээр нэгдүгээр курст элсэн орох оюутан их байдаг. Энэ байдал нь оюутны тоог нарийвчлан гаргахад хүндрэлтэй байдаг. Эдгээр оюутнаас 10-аад мянга нь оюутны дотуур байранд амьдардаг гээд бодохоор хөдөө орон нутгийн залуус нэлээд олноороо суралцаж байна.

-Энэ хичээлийн жилд хэдэн  оюутан  автобусаар зорчихоор болсон бэ?
-Энэ жил Монголын оюутны холбооноос 113 мянган оюутанг  автобусаар зорчуулах хүсэлтийг  нийтийн тээврийн газарт хүргүүлээд байна. Энэ асуудал нийслэлийн иргэдийн төлөөлөгчдийн хурлаар батлагдсанаар хүчин төгөлдөр болох юм. Харин өнгөрсөн жилийн хувьд 96 мянган оюутан автобусаар хөнгөлөлттэй зорчсон.

- Автобусаар хөнгөлөлттэй зорчих оюутнууд ямар нэгэн шалгуураар хамрагддаг уу?
-Нийт оюутнууд автобусаар хөнгөлөлттэй зорчихгүй. Дээр хэлсэнчлэн 10-аад мянган оюутан сургуулийнхаа хажууд дотуур байранд амьдарч байгаа. Бусад оюутнуудын хувьд автобус дамжих шаардлагатай оюутан энэ хөнгөлөлтийг эдлэх шаардлагатай. Энэхүү шалгуурыг тухайн сургуулийн оюутны холбоо судалгаа, асуулга явуулж ямар оюутан хамрагдуулах  вэ  гэдгээ шийддэг.

-Энэ жилийн хувьд  автобусаар хөнгөлөлттэй зорчих наалтын захиалга хэзээнээс ямар байдлаар захиалах  вэ?  
- Захиалгын хувьд гэвэл оюутнууд шар виза болон хүчин төгөлдөр наалтын хамт автобусаар хөнгөлөлттэй зорчих юм. Харин энэхүү наалт болон  шар визагаа тухайн сургуулийнхаа оюутны холбоон дээр захиалах хэрэгтэй. Ингэснээр Монголын оюутны холбоон дээр  сургууль тус бүр нэгдсэн журмаар энэ сарын 25 гэхэд захиалгаа өгөх хэрэгтэй. Ийнхүү бид ирэх сарын нэгэн гэхэд сургууль тус бүрд нь хүргүүлгэн өгсөн байх юм.  Хамгийн гол нь шинэ хуучин гэлтгүй оюутнууд маань сургууль тус бүр дээрээ одооноос захиалах хэрэгтэй. Энэ утгаараа  сургуулуудийн оюутны зөвлөл аль болох хурдан цуглаж  бүртгэлээ эхлэх  хэрэгтэй байгаа юм.  Яагаад гэвэл тухайн сургуульд олгох наалтын хэмжээгээр захиалгаа нэгдсэн журмаар авч дуусаад оюутны холбоонд өгөх ёстой. Бид тухайн сургуулийн захиалгыг цувуулж авах боломжгүй байдаг. Тиймээс оюутны холбоод анхаарах хэрэгтэй.

- Энэ жилийн хувьд оюутнууд шар визан дээр наах наалтаа хэдэн төгрөгөөр худалдан авах вэ?
 -Үнийн хувьд яг тэд гэж эцэслэн тогтоогдоогүй байна. Учир нь Оюутны холбоо үнэт цаасны компанаар тухайн наалтыг хийлгэдэг. Харин тухайн компани нэг наалт тэдэн төгрөг гэж бидэнд мэдэгдээгүй учир бид одоогоор мэдэхгүй байна.  Жилд тодорхой хэмжээгээр нэмэгддэг. Гэхдээ бид аль болох  үнэ нэмэгдэхгүй байх талаас нь ярилцана.

- Жил бүр яригддаг нэг асуудал байдаг. Энэ нь оройн 22.00 цаг гэхэд  оюутнуудыг автобусаар үнэгүй зорчуулахгүй гэдэг. Энэ тал дээр нийтийн тээврийн газартай ямар  гэрээтэй байдаг вэ?
- Оюутнууд шар виза болон хүчин төгөлдөр наалттай мөн оюутны үнэмлэхтэй тохиолдолд ажлын өдрүүдэд цаг, чиглэл харгалзахгүй зорчих эрх нь үүсдэг. Харин цаг зааж буй автобусууд ихэнх нь буух гэж байгаа автобус байдаг. Гэхдээ мөнгө нэхэх ёсгүй. Хэрвээ мөнгө авбал МОХ-ны санал гомдол хүлээн авах 70161143 дугаарт тухайн автобусны чиглэл болоод улсын дугаарыг мөн ямар асуудал үүссэн талаар мэдээлэх  хэрэгтэй. Ингэснээр тухайн автобусны компанитай хариуцлага тооцох цаашлаад энэ асуудал багасах боломжтой болох юм.

-  Энэ жил оюутны дотуур байр хэдэн төгрөгний үнэтэй байна вэ?
-Улсын сургуулийн оюутны дотуур байрны төлбөр 200-280 мянган төгрөг байгаа. Харин хувийн их, дээд сургуулийн дотуур байрны үнийг тухайн сургууль нь тогтоодог. Бид оролцох хууль эрхзүйн нөхцөл байхгүй. Нэмж хэлэхэд Оюутны холбооноос өнгөрсөн жилээс эхлэн дотуур байрны стандартыг мөрдүүлэхээр стандарт гаргасан. Өнөөдрийн байдлаар үйл ажилгаа явуулж байгаа дотуур байрны стандарт шаардлага хангахгүй байгаа. Цаашид баригдах дотуур байр давхар бүрдээ  ариун цэврийн өрөө, хатаагуурын өрөө, дүш, гал тогоо  гэх мэт  стандартын хэмжээнд баригдах шаардлага бий болоод байгаа.

- Энэ хичээлийн жилд Монголын оюутны холбооноос оюутан залууст чигэлсэн ямар ажил хийхээр төлөвлөөд байна вэ?
-Энэ жил оюутны холбооны хөдөлгөөн үүссэний 70  жийлийн ой тохиож байгаа. Уг арга хэмжээнд зориулан 70  бүтээлч ажил хийхээр төлөвлөөд байгаа. Үүний зарим нь эхнээсээ ажил хэрэг болоод байна. Тодруулбал, хоёр жилийн өмнө баригдаж эхэлсэн 1000 оюутны хотхон баригдаад энэ хичээлийн жилд ашиглалтанд орохоор болоод байгаа.  Мөн оюутны хөдөлмөр эрхлэлтийн тал дээр олон ажил санаачлан хийхээр төлөвлөөд байна. Үүнээс гадна оюутны талбайг машины зогсоол болгосон байгаа. Энэ газрыг эргүүлэн тохижуулж оюутан залуусын чөлөөт цагаа өнгөрүүлэх талбай бий болгохоор шаардлага хүргүүлээд байгаа. Шаардлагын хариуг 15-ны дотор  өгөх ёстой. Энэ хариуг одоогоор өгөөгүй байна. Тиймээс  уг талбайг тохижуулах тал дээр бид анхаарах болно.

- Өнгөрсөн жилээс эхлэн хэрэгжсэн оюутны 70 мянган төгрөг хэрхэн олгогдох вэ?
- Оюутнууд сайн суралцвал боломж их байгаа. Жишээлбэл улсаас олгож буй оюутны тэтгэлэг нэмэгдэнэ. Тодруулбал, бүх оюутан 70 мянган төгрөг авдаг, харин дүнгийн голчоос хамаараад дээд тал нь 100 мянган төгрөг вах боломжтой болсон байгаа. Мөн эрэлттэй арван мэргэжилээр суралцаж буй оюутны тэтгэлэг нэмэгдэх юм. Гэхдээ уг тэтгэлэг нь сар бүр оюутанд олгогдохгүй харин улирал бүр гурван сараар олгогдох юм. Учир нь улсын төсөв улирлаар мөнгөө төвлөрүүлж байгаа юм.