Энэ сарын 25-ны өдөр Баянхонгор аймгийн 2018 оны хоёрдугаар ээлжийн цэрэг татлагын өргөтгөсөн семинар боллоо.

Тус аймгийн Засаг даргын 2018 оны есдүгээр сарын 18-ны өдрийн А/631 дүгээр захирамжаар аймгийн хэмжээнд цэргийн жинхэнэ албаа хаан хугацаа дуусч бэлтгэлээр халагдсан байдлагч, түрүүчийг хүлээн авах, цэргийн жинхэнэ албанд иргэдийг татах, цэргийн гэрээт албанд элсүүлэх ажлыг ирэх сарын 1-ээс 12-ны өдрүүдэд зохион байгуулахаар болжээ.

Энэ оны эхний найман сарын байдлаар цэргийн насны залуусын эрүүл мэндийн талаарх мэдээллийн нэгдсэн санг үүсгэн ажиллаж байгаа аж. Залуус 18, 19 насандаа цэрэгт явах хүсэл, эрмэлзлэлтэй байдаг ч ямар нэг өвчний улмаас энэ насандаа хасагдвал түүнээс хойш цэргийн албанаас зугатаах хандлагатай болдог гэсэн судалгаа гарчээ. Нөгөө талаар ЕБС-ын төгсөх ангийн эрэгтэй сурагчдын дунд түүвэр байдлаар хийсэн судалгааны дүнг танилцуулсан байна. Дүнгээс харахад судалдгаанд оролцсон хүүхдүүдийн 37.7 хувь нь тамхи татдаг, 15.5 хувь нь газ, цавуу зэрэг мансууруулах зүйлс хэрэглэж байсан, 9.4 хувь мансууруулах төрлийн бодис хэрэглэж үзэх үү гэсэн саналыг авч байсан бол 15.5 хувь нь согтууруулах ундаа ууж үзсэн гэх хариу гарчээ. Тиймээс хүүхэд залуусыг аль болохоор 18-19 насанд цэргийн албанд хамруулсанаар элдэв хорт зуршлаас залуу үеийг хамгаалах боломж бүрдэхийг мэргэжлийнхэн хэлж байна.

2017 оны цэрэг татлагын нэг, хоёрдугаар ээлжээр нийтдээ 2000 гаруй залуус үзлэгт хамрагдсан байна. Гэвч тэдний 20 гаруй хувь тэнцэж, үлдсэн 80 орчим хувь нь эрүүл мэнд, боловсролын шалтгаанаар тэнцээгүй дүн мэдээ гарчээ. Цэргийн насны залуусын дунд дотор, халдварт, мэдрэл, ЭХО, арьс харшил, чих, хамар хоолой, нүд, шүд, мэс заслын өвчлөл өндөр байгаа аж.

Б.Лхам