Ус хангамж ариутгах татуургын өнөөгийн байдал, цаашдын чиг хандлага, гадны орнуудын туршлага судлах, салбарын шинэчлэн баталсан дүрэм журам, мэргэжил арга зүйн зөвлөмжөөр хангах зорилгоор “Ус хангамж, ариутгах татуургын салбарын зүүн бүсийн уулзалт, зөвлөгөөн”-ийг анх удаа Дорноговь аймагт өнөөдөр зохион байгуулагдаж байна.
Зөвлөгөөнд Улаанбаатар хот, Говьсүмбэр, Дорнод, Дорноговь, Замын-Үүд, Дундговь, Өмнөговь, Хэнтий болон Сүхбаатар аймгийн аж ахуй нэгжийн төлөөллүүд хамрагдаж байна.
Зөвлөгөөнийг аймгийн Засаг дарга Т.Энхтүвшин нээж, хэлсэн үгэндээ “Хотын хөгжилд ус, дулаан хангамж, нийтийн аж ахуй, инженерийн шугам сүлжээ чухал үүрэгтэй. Иймд орон нутгийн зүгээс тус салбарыг хөгжүүлэхэд ихээхэн анхаарал хандуулж дэмжлэг үзүүлэн ажиллаж байгаа бөгөөд 2016-2020 онуудад Аймгийн хэмжээнд төвлөрсөн дулаан хангамжид холбогдоогүй сумдыг халаалтын зуухтай болгож инженерийн шугам сүлжээнд холбох, Аймгийн дулааны станцад технологийн шинэчлэлт хийх, аймгийн төвд цэвэрлэх байгууламж шинээр барих зэрэг төсөл хөтөлбөрүүдийг хэрэгжүүлж байна.
Тухайлбал, 2017 онд Эрдэнэ суманд халаалтын зуух шинээр барьж, төвлөрсөн шугам сүлжээнд холбох ажлыг төр, хувийн хэвшлийн түншлэлийн хүрээнд хийж ашиглалтад оруулсан бол 2018-2019 онд Алтанширээ, Улаанбадрах сумдыг халаалтын зуух, инженерийн шугам сүлжээнд холбох ажлыг эхлүүлээд байна, цаашид үлдсэн сумдыг инженерийн шугам сүлжээнд бүрэн холбоно” гэв.
Мөн тэрбээр, “2019 онд Азийн хөгжлийн банкны төслийн хөрөнгө оруулалтаар 3000 м3/хоног хүчин чадал бүхий нэгдсэн цэвэрлэх байгууламжийг ашиглалтад оруулна, аймгийн төвийн дулааны станцын халаалтын зуухыг үе шаттайгаар шинэчилж, Сайншанд сумын гадна дулаан хангамжийг хоёр хэлхээнд шилжүүлнэ. Манай аймагт нийтийн аж ахуйн салбарын боловсон хүчнийг чадавхижуулах, мэргэжилтэй боловсон хүчин бэлтгэх хэрэгцээ шаардлага өсөн нэмэгдэж байна” гэсэн юм.
