Дорноговь аймагт Ус цаг уурын алба үүсэн байгуулагдсан түүхэн 80 жилийн ой тохиож, 10 дугаар сарын 12-ны өдөр ойн баярын хурал боллоо.

Баярын хуралд Цаг уур, орчны шинжилгээний газрын дарга С.Энхтүвшин, тус аймгийн Засаг даргын орлогч Г.Эрдэнэцэцэг болон Дорноговь аймгийн Ус цаг уурын албанд ажиллаж байсан үе үеийн ахмадууд, ажилтан албан хаагчид оролцож, эрхэлсэн салбартаа олон жил үр бүтээлтэй, бусдыгаа манлайлан ажилласан ажилтан албан хаагчдыг шагнаж урамшууллаа.

Анх Дорноговь аймгийн нутаг дэвсгэрт ЗХУ-ын техник тоног төхөөрөмж, мэргэжилтнүүдийн дэмжлэгээр 1938 оны наймдугаар сарын 18-нд Сайншанд цаг уурын станц байгуулагдан хөтөлбөрт ажиглалтаа хийж эхэлсэн байна.

Онгоцны нислэгт цаг агаарын бодит болон ирээдүйн мэдээний хангалт хийх зорилгоор 1954 онд Сайншанд цаг уурын станцыг аймгийн төвөөс нүүлгэн нисэх онгоцны буудал дээр ажиллуулсан ба төмөр замын тээвэрт цаг агаарын мэдээгээр үйлчлэх зорилгоор 1955 оны 5 дугаар сард Чойр, 1955 оны 10 дугаар сарын 24-нд Замын-Үүд сумдад цаг уурын станцууд байгуулагджээ.

Ус цаг уурын албаны удирдах газрын даргын 1963 оны зургадугаар сарын 25-ны өдрийн 84 тоот тушаалаар аймгийн төвийн цаг уурын станцуудын ажлыг өргөтгөж товчоо болгосон байна.

Ус цаг уурын шинжилгээний салбарууд 1963 онд Мандах, Сайхандулаан сумдад, 1965 онд Хөвсгөл хөдөө аж ахуйн харуул түүнийг 1968 онд өргөтгөж цаг уурын станц, 1969 онд Айраг, Улаанбадрах, 1970 онд Эрдэнэ, 1971 онд Алтанширээ, 1973 онд Мандах хөдөө аж ахуйн цаг уурын харуул “Станц” болж өргөтгөх, УЦУАУГазрын 1976 оны 32-р тушаалаар Сулинхээр сум татан буугдсан тул тус харуулыг татан буулгаж Хатанбулаг суманд шилжүүлсэн, 1974 онд Даланжаргалан, Өргөн сум, 1978 онд Мандах сумын Цагаанцав сангийн аж ахуйд, 1973 онд Иххэт сумын Хажуу-Улаанд хөдөө аж ахуйн цаг уурын харуул үүсэн байгуулагдаж байсан байна.