Сэлэнгэ аймгийн Мандал суманд долоо настай хүүгийн амь насыг хохироосон хэргийн талаар талийгаачийн гэр бүлээс мэдээлэл хийлээ.

Тодруулбал, 2017 оны зургадугаар сарын 7-ны 12.00 цагийн орчимд өдөр Сэлэнгэ аймгийн Мандал сумын Цагаан худгийн ойролцоо долоон настай хүүг М гэгч нь автомашинаар дайрч, 50 метр орчим газар чирч амь насыг нь хохироожээ.

Талийгаачийн ээж Н.Аюунцэцэг мөрдөн байгцаагч энэ хэргийг хоёр жил гаруйн хугацаанд даамжруулж, сунжруулсан гэдгийг энэ үеэр хэлсэн юм. Шинжээчийн дүгнэлтээр толгойн гэмтэл, няцралт, эрүүний хугарал, хэвлийн зүүн талын ташаа, цавины зулгаралт, баруун талын тархины бөмбөлгийн цус хурсан зэрэг гэмтэл авсан нь тогтоогджээ. Энэ гэмтэл нь доргих, үрэгдэх үед буюу авто ослын үед үүссэн байна. Шинжилгээгээр талийгаач нь үхэлд хүргэх эмгэгтэй өвчинтэй байгаагүй гэж гарчээ. Гэтэл эмнэлгийн байгууллагаас хүүг тархины саажилттай байсан гэх хуурамч дүгнэлт гаргуулснаас болж эл хэрэг хоёр жил орчим даамжирсан байна.

Осол гаргасан этгээдэд Сэлэнгэ аймгийн Мандал сумын шүүхээс нэг жилийн тэнсэн ял оноож, гурван жил автомашин жолоодох эрхийг нь хасчээ. Өөрөөр хэлбэл, хөнгөн гэмт хэрэг гэж үзсэн байна. Мөн осол гаргасан М гэгчийн ах нь талийгаачийн ээжийн гар утас руу мессеж бичин заналхийлсэн талаар мөн хэлсэн юм.

Уг хэргийн талаар талийгаачийн ар гэрийнхэн Монгол Улсын Ерөнхийлөгч, Хууль зүй дотоод, хэргийн яам, Цагдаагийн ерөнхий газар, Улсын дээд шүүхийн холбогдох албан тушаалтанд өргөдөл өгч, тусламж хүсчээ. Гэсэн ч хэргийн шийдвэрлэлт өнөөг хүртэл сунжирчээ.

Дээрх хэрэг давж заалдах шатны шүүхэд яваа бөгөөд Эрүүгийн хуулийг буруу хэрэглэсэн гэх шалтгааны улмаас хэд хэдэн удаа буцаагдсан аж. Тиймээс талийгаачийн ар гэрийнхнээс уг хэргийн үнэн зөв шүүж өгөхийг хүссэнээ үүгээр мэдэгдсэн юм.

Б.Лхам