Монголын хамгийн өндөр төлбөртэй сургуулийн жагсаалтыг тэргүүлдэг “British School of Ulaanbaatar” сургууль руу үл таних 20 гаруй хүн дайрч, сургуулийн захирал Ц.Ариунааг өчигдөр барьцаалж, хүч хэрэглэн түрэмгийлсэн гэх мэдээлэл тархсан. Гэрчүүдийн ярьж буйгаар баасан гаригийн 17.50 минутын үед хүүхдээ авна гэж хоёр залуу сургуулийн байр руу орсны дараа араас нь 20 гаруй залуус орсон байна. Ингээд ажилчдыг хөөж гаргахдаа хүч хэрэглэжээ.

Өөрсдийгөө тус сургуулийн хувьцаа эзэмшигч Оюунгэрэлийн хүмүүс, хувьцаа эзэмшигчийн даалгавраар одоогийн удирдлагуудыг солих гэж байгаа  мэдэгдсэн дээрх залуус архи ууж, сургуулийн эд хогшлыг эвджээ.

Үймээн самуун дэгдэх үеэр зургаан иргэн гэмтсэн байна. Тэднийг гэмтлийн эмнэлэгт хүргэж, улмаар шүүх эмнэлгийн дүгнэлт гаргуулах юм байна. Тус сургууль нь 500 гаруй сурагчтай бөгөөд багш нь Англи Улсаас урилгаар ирж ажиллладаг. Өчигдөр болсон үймээний улмаас зарим багш нар нутаг буцахаа мэдэгдсэн бол заримых нь хаана байрлаж байгаа нь тодорхойгүй алга болсон гэх мэдээлэл байна. Ямартай ч үймээн самуун дэгдээсэн хүмүүсийг цагдаагийн байгууллага шөнийн 00.00 цагийн үед тараажээ.

Уг үймээний гол шалтгаан нь хөрөнгө оруулагчдын дунд үүссэн маргаантай холбоотой гэдгийг тус сургуулийн захирал Ц.Ариунаа лайв хийх үеэрээ мэдэгдсэн. Тэрбээр “Эрхэм хүндэт Ерөнхийлөгчөө, Эрхэм хүндэт Ерөнхий сайд би иргэний эрхийнхээ хүрээнд та бүхэнд хандаж байна. Би 2010 онд байгуулсан сургуулийнхаа дотор төрийн далбааныхаа дэргэд барьцаалагдаад, хүч түрэмгийлсэн хүмүүсийн дунд зогсож байна. Би хэдэн онд ямар нийгэмд амьдарч байгаагаа мэдэмээр байна. Би Монгол Улсын боловсролын салбарт ирээдүй үр хүүхдийнхээ төлөө энэ сургуулийг байгуулсан. Энийг бүх хүн  мэднэ. Та нар манай сургуулийн вэб сайт руу ороод үзээрэй. Хэн яаж байгуулсныг үзээрэй. Баян чинээлэг хүмүүс бидний Монгол улсын ирээдүйн төлөө хийсэн баялгийг булаан дээрэмдэж байгаа юм байна. Энэ төрөөс дээрэмдэж авсан НИК компани биш. Энэ бол Эрдэнэтэд бензин шахаж байгуулсан ПЕТРОВИС ХХК биш. Энэ бол миний оюун санаагаа дайчлан бүтээсэн хөрөнгө. 

Тиймээ,  ПЕТРОВИС ХХК Ц.Оюунгэрэл хөрөнгө оруулсан нь үнэн. Гэхдээ тэр хүний 2,5 сая ам.доллар 30 хувьд нь хүрэхгүй хөрөнгө оруулалт хийсэн.  Бусад мөнгөө би ХАС БАНК-аас зээл авч байгуулсан. Энэ зогсож байгаа залуучууд хэний төлөө намайг ингэж байгаа юм бэ?. Ж.Оюунгэрэл гэж хэн юм бэ. Та нар юуны төлөө тэмцэж байгаагаа мэдэх үү. Би Англиас энэ утаатай Улаанбаатарт өндөр цалинтай багш нарыг яаж авчирдагыг мэдэх үү. Өнөөдөр АНГЛИ багш нар чемоданаа чирээд буцаж байна. Намайг хамгаалах төр улс байна уу. ШАРК Ж.Оюунгэрэл эгчээ, та бусад компанид хөрөнгө оруулчаад яг ингэж дээрэмдэх үү. Тийм ШАРК байдаг юм уу” хэмээн ярьсан юм. Энэ хэргийг Хан-Уул дүүргийн цагдаагийн II хэлтсээс шалгаж байна.