ШШГЕГ-ын харьяа Цагдан хорих 461 дүгээр ангид амиа алдсан гавьяат хуульч Л.Бямбаагийн бэр Р.Мөнхзул newspress.mn сайтад ярилцлага өгчээ. Тэрбээр “Миний ээж амиа хорлох хэмжээний сул дор хүн биш гээд өнгөрөгч пүрэв гарагт ээж утсаа авахгүй байсан. Гэтэл орой 18.30 цагийн үед аав “Манайд АТГ-аас нэгжлэг хийлээ” гэсэн. Тэгтэл ээжийн ажлын газраас залгаад “Даргыг АТГ-ынхан аваад явлаа” гэсэн. Биднийг хүлээж байхад шөнө 12.00 цагийн үед байцаагч нь “Дулаан хувцсыг нь авчир” гэж хэлсэн. Баасан гарагийн өглөө байцаагчийнх нь утас холбогдохгүй байсан. Шүүх рүү тодруулахад бичиг ирээгүй гэж байсан. Байцаагчаа хайсаар байгаад ажлын цаг дууссан. Ээж ажлын хүндээ “Маргааш орой ирвэл ирэхгүй юу. Энд юугаа хүлээх вэ дээ” гэсэн байна лээ. Суллагдана гэдгээ ээж мэдэж байсан. Гэтэл суллах цаг нь болчихоод байхад суллахгүй байхаар нь шөнийн 02.00 цагт залгахад “Би даргатайгаа яриулъя” гээд тасалсан. Шөнө 04.00 цагийн үед бөөн юм болж байж дүү орсон. Гэтэл “Ээж 21.40 цагийн үед өнгөрсөн байна. 15.00 цагт бүртгэлд хамруулахад зүгээр байж. Хорих ангийн дарга нь согтуу байна” гэж уйлсан. Шийдвэр гүйцэтгэлийнхэн шөнө 12.00 цагийн үед буюу ээжийг өнгөрснөөс хоёр цаг хагасын дараа цагдаа дуудсан юм билээ. Биднээс нууцалж байгаад 04.00 цагт хэлсэн гэхээр долоон цагийн дараа. Манай хүн ээжийг гарч ирэхгүй болохоор АТГ-д аваачсан байх гээд тийшээ явсан байсан учраас эхлээд хэлээгүй. Талийгаачийг харья гэхэд харуулахгүй, машинаар аваад моргийн газар руу шууд явч явсан. Хоёр хүүхэд нь Шүүхийн шинжилгээнийхэнтэй зодолдож байж ээжийг харж, мишок дотроос царайг нь гаргаад зургийг нь дарсан. Тэгтэл цагдаагийн хүмүүс зургийг нь устгуулна гэж утсыг нь булаах гэж оролдсон. Энэ бол яавч амиа хорлолт биш. Тэр өрөө камертай бол бичлэг нь байгаа. Сүүлд сонсоход ээжийг амиа алдахаас гурван цагийн өмнө гадуур байцаасан юм билээ. Нэг бол тэр хооронд шахаж дарамталсан, үгүй бол хоолонд нь элдэв зүйл хольсон байх” гэжээ.