Дорноговь аймгийн Зүүнбаян дахь Зэвсэгт хүчний 336 дугаар ангид алба хааж байсан хугацаат цэрэг амиа алдсан хэргийг цагдаагийн байгууллага шалгаж, хоёр алба хаагчийг цагдан хориод буй. Тэгвэл дахин нэг цэргийн алба хаагч амиа алдсан хэрэг өнгөрсөн сарын 28-нд гарчээ. 
Тодруулбал, Зэвсэгт хүчний 310 дугаар ангийн алба хаагч, ахлах ахлагч Г өнгөрсөн пүрэв гарагт элс ачиж явсан ангийнхаа машинд дайруулж амиа алдсан гэнэ. Осол болсныг Зэвсэгт хүчний техникийн албаныханд мэдэгдсэн байна. Уг хэрэг Налайхын элсний карьер орчимд болсон бөгөөд Зэвсэгт хүчний 310 дугаар ангийн захирагч, хурандаа Баянжаргал талийгаачтай хамт “Найман шарга” гүүний саамны амралтын орчимд барьж буй хаусуудын барилгын явц, байдалтай танилцахаар очсон байсан талаарх мэдээлэл цацагдсан юм.

ЗХЖШ-ын дарга асан, дэслэгч генерал Д.Даваагийн хаус нь газрын цэвдгээс болж доош суусан бөгөөд 310 дугаар ангийнхан засаж буй гэх мэдээлэл бий. Мөн тухайн осол гаргасан машин нь гадуур ажиллах хуваарьгүй байсан сурагтай. Ингэж явахдаа элсний карьер орчимд 310 дугаар ангийн “Зил-130” машин эвдэрсэнтэй таарч, ангийн захирагч Баянжаргалын өгсөн чиглэлийн дагуу талийгаач туслахаар үлдсэн аж. Талийгаач машины дугуйнд ивээс хийж байтал гэнэт хөдөлснөөс болж осол болсон бололтой.