Цагдан хорих 461 дүгээр ангид хоригдсон цагаасаа хорих ангийн эмнэлгийн орноос салаагүй “Жаст”-ын Ш.Батхүү өдгөө наранд тааваараа алхаж явна. Түүнийг ингэж нарлаж суух зуур монголчууд өдөр бүр 78 сая төгрөгийн торгуулийн төлбөрт уначихаад байна. Үүнийг тодруулбал, Монголын тэргүүн баянд тооцогдож явсан “Жаст”-ын Ш.Батхүү “Эрдэнэт” үйлдвэрийг барьцаалж, Өмнөд Африкийн “Стандарт” банкнаас авсан зээл авсан байдаг. Ингэж зээл авахдаа тухайн үеийн Эрдэнэтийн удирдлагууд болон холбогдох албан тушаалтантай үгсэн хуйвалдсан нь илэрч, хэргийн холбогдогчид шил шилээ даран хорих ангийг зорьсон юм.

Гэвч “Монголын хууль гурав хоног” гэгчийг баталж, “ГОК”-ын Ч.Ганзориг тэргүүнтэнгүүд хэдхэн хоног саатуулагдаад л суллагдсан. Тэдний араас мань Жастын Ш.Батхүү ч гэсэн суллагдснаар нарлаж яваа нь энэ. Тэгвэл авсан зээлээ төлөөгүйн улмаас Эрдэнэт үйлдвэр зээлийн үндсэн төлбөрт 51 сая, хүү торгууль, шүүхийн зардал зэрэгт 44 сая, нийтдээ 95 сая ам.долларыг төлөхөөр Лондонгийн олон улсын арбитрын шүүхээс 2017 оны долдугаар сарын 27-ны өдөр  шийдвэр гаргасан юм.

Үндсэн зээлээс гадна сард 870-900 долларын хүү, торгууль төлөхийг Арбитрын шүүхийн шийдвэрт дурдсан байдаг. Үүнийг сард хуваавал өдөрт дунджаар 78 сая төгрөг буюу  “Стандарт” банктай холбоотой “Эрдэнэт”-ийн маргааныг эцэслэхгүй удах тусам монголчууд өдөр бүр ийм хэмжээний төгрөгийг зөвхөн хүүгийн төлбөрт алдана гэсэн үг юм.

Ийм балаг тарьсан дээрх нөхдүүд болох “Жаст”-ын Ш.Батхүү, “ГОК”-ын Ч.Ганзориг, “Алтжин”-гийн Г.Алтан, түүний хүү Эдвард Сүрэн нарт холбогдох хэргийг өнгөрсөн долоо хоногт мөрдөн байцаалтад буцаасан. 

Ингэж Монголын шүүх байгууллага ард ттүмний өмчийг гадныханд барьцаалж, эх орноосоо урвасан нөхдүүдийн толгойг илж суух зуур монголчууд өдөр бүр 78 сая төгрөгийг зөвхөн торгуульд төлсөөр байна. Ингэж болно гэж үү.

Уг үйл явдлаас хойш цөөнгүй жил өнгөрлөө. Одоо Арбитрийн шүүхэд төлөх ёстой төлбөр, төлөөс хэд болж өссөнийг чөтгөр л мэдэх байх. Ийм атал Эрдэнэтийн 49 хувийг хэн хувьчилж авсан гэдэг ганцхан зүйлийг л ярих нь хэтэрхий өрөөсгөл биш гэж үү. Бүр тодруулбал, Эрдэнэтийн 49 хувь нэгэнт Монголын эзэмшил болсон нь тодорхой. Хууль бус үйлдэл байвал үүнийг хөөн хэлэлцэх цаг хугацаа бидэнд хангалттай бий.

Харин өдөр ирэх туссам өр ширэнд унагаж байгаа 51 хувийн асуудлаа хурдхан цэгцэлж, өр ширнээсээ салж, ард түмний өмчийг барьцаанд тавьсан нөхдүүдтэй хариуцлага тооцооч ээ гэж эрх баригчдаас хүсэе. 

Г.Нацаг