Эрдэнэт үйлдвэрийн “Стандарт” банканд төлөх өрийг шийдвэрлэсэн. Ингэхдээ зээлийн үндсэн хүүг төлөхгүй, харин үндсэн төлбөрийг нь төлөхөөр харилцан тохиролцохоор яригдаж байгааг эх сурвалж мэдээллээ.

Ингэхдээ Зээлийн үндсэн төлбөрийг Монгол Улсын Засгийн газар бус, “Эрдэнэт” үйлдвэрийг Өмнөд Африкийн “Стандарт” банкны барьцаанд тавьсан буруутай этгээд болох “Жаст”-ын Ш.Батхүү нараар төлөөлүүлнэ гэдэг яриа ч байна.

Тодруулбал, Олон улсын Арбитрын шүүхийн шийдвэрээр “Эрдэнэт” үйлдвэрийн 51 хувийг Стандарт банкны барьцаанд тавьсны төлбөр болох 44.3 сая ам.долларыг Монгол Улсын Засгийн газраас нэхэмжилсэн. Тэгвэл Засгийн газраас хамтран ажиллах Шадар сайд Ө.Энхтүвшингээр ахлуулсан ажлын хэсэг ажиллаж байгаа.

Хамгийн сүүлд “Стандарт” банкнаас өр төлбөрийн асуудлыг яаралтай шийдэх тухай тав хоногийн хугацаатай албан бичиг ирсэн бөгөөд шаардлагатай тохиолдолд “Эрдэнэт” үйлдвэрийг битүүмжлэх асуудал үүснэ” гэдгийг үүгээр мэдэгдсэн байна. Энэ талаар банкны төлбөрийг хэрхэн төлөх, Монгол Улс, “Эрдэнэт” үйлдвэрт хохирол багатайгаар хэрхэн зохицуулах боломжтойг судлах, ажлын хэсгийн ахлагч Шадар сайд Ө.Энхтүвшин “Стандарт” банкны өрийг “Эрдэнэт” үйлдвэрт хохирол багатайгаар шийдвэрлэхээр талууд ярилцаж байгаа гэж хэлээд албан ёсны мэдээлэл өгнө гэсэн боловч тодорхой тайлбар өгөөгүй юм.

Зарим эх сурвалжийн хэлснээр “Стандарт” банканд хүү төлөхгүйгээр зөвхөн зээлийн үндсэн төлбөрийг буруутай этгээдүүдээр төлүүлэх “тохиролцоонд” хүрэх магадлалтай байгаа аж.

Өөрөөр хэлбэл, 2018 оноос хойш Засгийн газраас “Стандарт” банктай олон удаагийн яриа хэлэлцээр хийсний үр дүнд тус банкныхан өрөндөө 60 орчим сая ам.долларыг аваад асуудлыг нэг тийш нь шийдье гэдэг тохиролцоонд хүрсэн бололтой юм. Хэрвээ Засгийн газраас энэ өрийг төлбөл, хэргийн буруутан болох Ш.Батхүү нараар уг төлбөрийг нөхөн төлүүлнэ гэдэг яриа ч бас байна.

Одоогоор “Жаст”-ын Ш.Батхүүгийн нэр дээрх бүх эд хөрөнгө, банкан дахь дансыг битүүмжилсэн. Гэвч битүүмжилсэн хөрөнгө нь “Стандарт” банкаас авсан өрийн хаа ч хүрэхгүй гэдэг тооцоолол бийг эх сурвалж мөн өгүүлсэн. АТГ-аас мэдэгдснээр Ш.Батхүүгийн орон нутаг болон гадаадад нуусан хөрөнгийг олох, битүүмжлэх ажил үргэлжилж байна.

Сануулахад, “Жаст” группийн захирал асан Ш.Батхүү “Эрдэнэт” үйлдвэрийн нэрийг барьж, хуурамч бичиг баримт бүрдүүлэн Өмнөд Африкийн “Стандарт” банкнаас 100 гаруй сая ам.долларын зээл авсан хэргийг шалгаж, прокурорт шилжүүлээд байгаа юм. Эл хэрэгт Ш.Батхүүгээс гадна “Эрдэнэт” үйлдвэрийн захирал асан Ч.Ганзориг буюу УИХ-ын гишүүн Г.Тэмүүлэнгийн аав, тус үйлдвэрийн хэлтсийн даргаар ажиллаж байсан Б.Мөнхжаргал нарын хүмүүс холбогдоод буй.

“Эрдэнэт” үйлдвэрийн захирал асан Ч. Ганзоригийн хувьд “Үйлдвэрийг “Стандарт” банкны барьцаанд тавьсан хэрэгт буруугүй. Би гарын үсэг зураагүй” гэж мэдүүлсэн. Түүнийг 2018 оны сүүлчээр АТГ-аас прокурорын зөвшөөрлөөр цагдан хориод суулласан.

Тэгвэл “Жаст”-ын Ш.Батхүүгийн хувьд эхлээд Ч.Ганзориг банкны гэрээнд гарын үсэг зурсан гэж мэдүүлсэн бол өнгөрөгч 2018 онд мэдүүлгээсээ буцаж, Ч.Ганзоригийн гарын үсгийг хуурамчаар үйлдсэн гэж мэдүүлсэн юм.

Ингэснээр хэргийг ганцаараа үүрч, бусдыгаа ялаас мултлах гэлээ гэсэн хардлагад мөн л өртөөд буй.

Ямартай ч “Эрдэнэт” үйлдвэрийг Өмнөд Африкийн “Стандарт” банкны барьцаанд тавьсан өр төлбөрийг төлбөх асуудлыг Засгийн газрын хуралдаанаар тун удахгүй оруулах бололтой. Эндээс банкны барьцааны мөнгийг төлж, “Эрдэнэт”-ийн чөлөөлөх шийдвэр гаргалаа ч буруутай этгээдүүд төлбөрөө төлж таарна.

Ингэвэл зөвхөн “Жаст”-ын Ш.Батхүү төдийгүй цагтаа цалгиж явсан УИХ-ын экс гишүүн, “ГОК”-ын Ч.Ганзориг ч гэсэн халаасаа сэгсэрч мэдэх юм.

Г.Эрдэнэ