Улсын ерөнхий прокурорын газрын Сургалт, судалгааны төвийн судлаач, багш, хяналтын прокурор П.Эрдэнэбат өөрийн хүсэлтээр ажлаа өгч, АТГ-т шалгуулах хүсэлтээ гаргасан талаар мэдээллэсэн билээ. Тэрбээр энэ талаараа “2018 оны тавдугаар сараас хойш өнөөдрийг хүртэлх хугацаанд АТГ-т “Макс” компанийн захирал Д.Ганбаатар гэх хүний гаргасан гомдлын дагуу намайг үндэслэлгүйгээр хөрөнгөжсөн гэх асуудлаар хэрэг бүртгэлтийн хэрэг нээн шалгаж байгаа. Энэ бүх хугацаанд АТГ-аас намайг нэг удаа гэрчээр дуудаж байцаалт авсан. Нэр цэвэр үлдэхийн тулд ажлаа өгчихөөд шалгуулъя гэж бодсон. Надад нууж хаах зүйл байхгүй. Тодорхой хэмжээний хөрөнгө, орлого бий. Прокурорын байгууллагад орохоосоо өмнө олон жил бизнес хийсэн.

Одоо амьдарч байгаа орон сууцаас гадна хоёр орон сууц бий. Үйлчилгээний зориулалт бүхий 4 талбай бий. Гэр хороололд учраас борлогдохгүй болохоор нь үл хөдлөх хөрөнгийн гэрчилгээ гаргуулсан. Олон жил хийсэн бизнес, өөрт байсан эд зүйлсээ зарж үрээд гэр хороололд барилга барьсан. 24 айлын орон сууц. Заримыг нь урт хугацаатай зээлээр өгсөн. Заримыг нь бизнесийн хөрөнгө оруулалтад ч өгсөн. Худалдаа үйлчилгээний чиглэлээр “Хатан ирээдүй" гэж компани байсан. “Макс”-ын Д.Ганбаатартай хувийн өр авлага, өс хонзонгийн асуудал байхгүй. Би жирийн төрийн тусгай албан хаагч. Монгол Улсын Үндсэн хууль, Газрын тухай хуульд заасан эрхийнхээ дагуу гэр бүлийн хэрэгцээний 0.6 га газар авсан. Гэтэл энэ газар нь морин тойруулгын хажууд байж таарсан. Д.Ганбаатар миний авсан 0.6 га газрыг авахын төлөө энэ бүх асуудлыг үүсгэсэн гэсэн” юм.

Тэгвэл эх сурвалжуудын өгүүлж буйгаар П.Эрдэнэбат нь Сонгинохайрхан, Хан-Уул дүүргийн прокуророор ажиллаж байх хугацаандаа тухайн дүүрэгт их хэмжээний газар авсан болох нь баримтаар нотлогддог байна. Мөн Драгон төвийн урд, явган хүний зам хааж барьсан үйлчилгээний төвийг хүртэл тус дүүргийн прокуророор ажиллаж байхдаа газрыг нь авч, үйлчилгээний барилга барьсан гэдгийг хэлж буй. Үүнээс гадна Хан-Уул дүүргийн прокуророор ажиллаж байхдаа иргэдийн газрыг хууль бусаар авахыг санаархсан талаар нэр бүхий иргэд мэдэгдсэн удаатай.

Прокурор П.Эрдэнэбат өөрийгөө өмөөрч хэлсэн үг болон нэр бүхий иргэдийн дэлгэсэн баримт ийм байна. Тэгвэл АТГ-т прокурор П.Эрдэнэбат ямархуу хөрөнгөтэй гэж мэдүүлсэн бэ. Тэрбээр 2017 онд АТГ-д хөрөнгөө мэдүүлсэн прокуроруудаас хамгийн их хөрөнгөтэйд нь тооцогдсон байдаг.

Өөрөөр хэлбэл, өөрийн орлого нь 36.3 сая, гэр бүлийн орлого нь 42.1 сая төгрөгийн орлоготой гэж мэдүүлсэн нь бусдаас нэг их ялгарахгүй мэт.

Гэтэл таван 4 тэрбум 451 сая төгрөгийн үнэ бүхий орон сууц, таван үйлчилгээний барилга, зургаан өвөлжөө хаваржаатай гэсэн бол 164.7 саяар үнэлэгдэх автомашин, 173 сая төгрөгийн түүхийн болон үнэт эдлэлтэй гэжээ.

Энд хамгийн хачирхалтай зүйл нь прокурор П.Эрдэнэбат нь нийслэлийн хэд хэдэн дүүрэгт, тэр дундаа ашигтай байрлалд хамгийн багадаа 30.000 мк газартай гэж мэдүүлсэн атлаа үүнийгээ ердөө 4 сая төгрөг гэж мэдүүлжээ.

Угтаа бол нийслэлийн гэр хорооллын гуу, жалганы ирмэг дээрх газар ч ийм ханштай биш гэдгийг иргэд андахгүй. Гэтэл прокурор П.Эрдэнэбат өөрийн эзэмшлийн гэж мэдүүлсэн дээрх их хэмжээний газраа ердөө 4-хөн саяар үнэлсэн нь хэр шударга зүйл юм бол доо.

Үүнээс гадна тэрбээр 182 сая төгрөгийн хадгаламжтай бол 4 тэрбум төгрөгийн авлагатай гэдгээрээ хууль хяналтын байгууллагын хамгийн баянд тооцогддог.

Түүнчлэн Говь, Атар нөхөрлөл, Уран барилга зэрэг компаниас 6000 гаруй ширхэг хувьцаа эзэмшдэг бол гурван патентийн эрхтэй.

Энэ мэтчилэн түүний хөрөнгийг тоолж барахын аргагүй. Тэрбээр прокурор болохоосоо өмнө 10 жил хувийн хэвшилд ажилласан гэж хэлсэн. Түүний хэлснээр өөрийн энэ бүх хөрөнгөө баталж чадна хэмээж буй ч дүүргүүдийн прокурорт ажиллах бүртээ тухайн дүүрэгт их хэмжээний газрыг торох юмгүйгээр авч чаддаг байсан үйлдлээ юу гэж тайлбарлах юм бол.

Г.Эрдэнэ