Өнгөрөгч гуравдугаар сарын 13-ны өдөр никель Ганбаа буюу Г.Дашням болон өөр хоёр иргэний хамт хар тамхи хэрэглэсэн гэдэг үндэслэлээр цагдаагийн алба хаагчид саатуулсан байдаг.
Гэтэл хавтаст хэргийг Хар тамхитай тэмцэх газарт шилжүүлэх явцад, хэргийн материалд хавсаргасан байсан нотлох баримтууд алдагдсан гэх мэдээлэл өнөөдөр цацагдсан. Үүнтэй холбогдуулан ЦЕГ-аас албан ёсны тайлбар хийлээ.
Үүнд, “Сүхбаатар дүүрэг дэх цагдаагийн Нэгдүгээр хэлтээс “2019 оны 03 дугаар сарын 13-ны өдөр Сүхбаатар дүүргийн 3 дугаар хороо 19 дүгээр байрны гадна зогсоол дээр ....... УБМ улсын дугаартай тээврийн хэрэгсэлд 3 залуу мансууруулах эм, сэтгэцэд нөлөөт бодис хууль бусаар хадгалсан, хэрэглэсэн” гэх хэрэг бүртгэлтийн хэргийг ЦЕГ-ын Хар тамхитай тэмцэх гарын Мөрдөн шалгах хэлтэс 2019 оны 04 дүгээр сарын 11-ний өдөр нь хүлээн авч, мөрдөн шалгах ажиллагаа явуулж байна. Энэхүү хэрэг бүртгэлтийн хэргийг Хар тамхитай тэмцэх газарт шилжүүлэх явцад “Хэргийн материалд хавсаргасан байсан нотлох баримтууд алдагдсан” гэсэн нь худал мэдээлэл болно.
Харин энэхүү хэрэг бүртгэлтийн хэрэгт холбогдуулан шалгаж байгаа 3 этгээдийг баривчлах явцад дээрх этгээдүүд нь нотлох баримтаа устгах үйлдэл хийснийг дуудлагаар очсон тус дүүргийн цагдаагийн хэлтсийн алба хаагчид таслан зогсоож эд мөрийн баримтыг бэхжүүлэх, хураан авах үйл ажиллагаа явуулсан. Дээрх хэрэг бүртгэлтийн хэрэгт эд мөрийн баримт болон биолигийн дээжинд дахин шинжилгээ хийлгэхээр шинжээч томилсон ба Прокурорын хяналтан дор мөрдөн шалгах үйл ажиллагаа үргэлжилж байна” гэжээ.
