Налайх дүүрэгт байрлах хятадын хөрөнгө оруулалттай “Эрдэнийн хөгжил” нүүрс олборлолтын уурхайд энэ сарын 20-ны орой дөрвөн хүн осолдож, гурван хүн амиа алдсан харамсалтай хэрэг гарсан билээ. Энэ талаар нийслэлийн Мэргэжлийн хяналтын газрын дарга Л.Эрдэнэчулуун “Тус уурхайд удаа дараа шалгалт хийсэн. Энэ бүрт лацдаж хаадаг байсан. Сүүлийн шалгалтыг энэ сарын 8-ны өдөр явуулж, үйл ажиллагааг нь зогсоосон байсан. Ингээд хэвлэлийн хурал хийж, ямар зөрчил илэрснийг мэдээллэж, холбогдох яам, АМГТ-т тусгай зөвшөөрөл цуцлах хүсэлт явуулсан. Гэвч хариу ирээгүй. Шалгалтаар ажилчидтай жилийн хугацаатай гэрээ хийхдээ ажилчдын эрх ашиг, аюулгүй байдлыг хангана талаар нэг ч үг, үсэг тавигдаагүй байсан нь илэрсэн. Үүнээс гадна маш олон ноцтой зөрчил илэрсэн. Тухайлбал, уурхайн хоёр багана бяцралт өгсөн учир дахин хүн оруулах боломжгүй болсон. Нуралт үүсэх эрсдэлтэй гэдгийг хятадуудад удаа дараа анхааруулж, хаалгыг нь лацадсан.

Хуулийн хүрээнд Мэргэжлийн хяналтын газраас ийм л арга хэмжээ авдаг. Лацдаад үйл ажиллагааг нь зогсоодог. Тусгай зөвшөөрлийг нь цуцлах саналаа хүргэдэг.

Бид энэ бүх процессийг гурван жилийн турш хийж ирсэн боловч хятад эздүүдийн хууль бус үйлдлийг таслан зогсоохыг хичээсэнгүй.

“Уурхайн тусгай зөвшөөрлийг цуцлаач” гэж удаа дараа хүсэлт явуулсан ч хүлээж аваагүй. Эцэст нь гурван иргэн амиа алдлаа.

Биднийг шалгалт хийснээс хоёр өдрийн дараа лацыг хууль бусаар аваад олборлолт хий гэж хүчээр оруулсан байна лээ. Ажилчид ороод нэг их удаагүй нуралт үүссэн гэсэн. Цооногын баганад бяцралт өгөх үед 377 метрийн гүн нуралт үүссэн. Нуралтын үеэр аврах ангийн алба хаагчид нэг иргэний амийг аварсан ч гурван иргэнийг аварч чадаагүй.  Нас барсан иргэд хохирогчид 27-46 настай, 2-4 хүүхдийн аав байсан” гэсэн юм.

Ослын газарт тус уурхайн 10-аад хятад эзэд байсан ч цагдаа ирэх сургаар олонх нь зугтжээ. Гэсэн ч Монгол талыг хариуцсан таван ажилтан нь баригдаж, Налайх дүүргийн Цагдаагийн хэлтэст саатуулагдсан байна.

Г.Нацаг