ЦЕГ-ын дэд даргаар ажиллаж байсан З.Дашдаваа АТГ-ын даргаар томилогдоод хоёр долоо хонох гэж байна.

Сүүлийн жилүүдэд анхаарлын төвд байж ирсэн АТГ-ын даргаар гэнэтэхэн томилогдсон энэ “битүү морь”-ийн талаар олон  нийт төдийлэн сайн мэдэхгүй.

З.Дашдаваагийн хувьд 1995-1996 онд Хэнтий аймгийн Цагдаагийн газарт эрүүгийн төлөөлөгч, 1996-2001 онд БГД-ийн Цагдаагийн хэлтэст хэрэг бүртгэгч, эрүүгийн төлөөлөгч, 2002-2003 онд ЭЦГ-т эрүүгийн төлөөлөгч, 2003-2006 онд Говь-Алтай аймгийн Цагдаагийн хэлтэст Эрүүгийн тасгийн дарга, 2006-2008 онд СХД-ийн Цагдаагийн хэлтэст Эрүүгийн тасгийн дарга, 2008-2014 онд ЦЕГ-ын Дотоод хяналт, шалгалт, аюулгүй байдлын хэлтэст тасгийн дарга, хэлтсийн дарга, 2014-2017 онд ХСИС-ийн Цагдаагийн сургуулийн захирал, 2017 оны гуравдугаар сараас СБД дэх Цагдаагийн хоёрдугаар хэлтсийн дарга,  2017 оны аравдугаар сараас ЦЕГ-ын дэд даргаар ажиллаж байсан. Нэг үгээр З.Дашдаваа нь насаараа цагдаагийн байгууллагад тэр дундаа эрүүгийн хэрэг бүртгэлтийн чиглэлээр ажиллаж ирсэн байна.

Нутаг ус нь Хэнтий аймгийнх учраас Ерөнхий сайд У.Хүрэлсүхийн дэмжлэгтэй гэж түүнийг харж болно.

Тэрээр нэгэнт албан тушаал нь болоод ажил хэрэг нь хэл ам таталсан АТГ-т очлоо.Тэгэхээр түүнийг ажлаа яаж хийх нь вэ гэдгийг олон нийт ч , улс төрийн хүрээнд ч анхааралтай ажиглаж байна.

Юуны түрүүнд Оюутолгой, Хөгжлийн банк, Бондууд, Өршөөлийн хуулиар “үгүй хийсэн” 33 тэрбум, Стандарт банк, Эрдэнэтийн 49 хувь, ЖДҮХС зэрэгтэй холбоотой хэргийг энэ нөхөр хэрхэн шийдэх вэ гэдгийг нийтээрээ харж байгаа юм.

Гэхдээ З.Дашдаваатай хамт ажиллаж, байсан мэддэг хүрээнийхэн нь “Энэ хүн олны анхаарлын төвд орсон хэргүүдийг эрчимтэй шалгаж шийдвэрлэж чадна. Яагаад гэвэл З.Дашдаваа сүүлийн жилүүдэд АТГ-ын даргаар ажиллаж байсан хүмүүсээс хэрэг бүртгэлтийн чиглэлээр мэргэшсэнээрээ ялгаатай. Энэ нь АТГ-ынхан олны анхааралд орсон хэргүүдийг, ер нь авлигын хэргүүдийг шүүх буцаагаад байхгүйгээр нэгмөр, далайцтай шалгах давуу тал болох юм. Цагдаад ажиллаж байхад нь түүнийг “Зуудаг” гэж хочилддог байсан. Ямар нэг хэрэг шалгахад шүүх, прокуророос буцаах юм уу, хэрэгсэхгүй болж байсан тохиолдол бараг үгүй. Барьж авсан хэрэг, асуудлаа тавьдаггүй, мухарладаг гэсэн үг” гэж ярьцгааж байна. АТГ-ын шинэхэн дарга З.Дашдаваагийн талаар иймэрхүү мэдээлэл байна.

Тэгэхлээр АТГ-ын дарга З.Дашдаваа эдгээр Оюутолгой, Хөгжлийн банк, Бондууд, 33 тэрбум, Стандарт банк, Эрдэнэтийн 49 хувь, ЖДҮХС-гийн хэргүүдийг ойрын үед мухарлаж шалгаж дуусгах бололтой юм. Түүнээс гадна тэрээр ХХАА-н сайд асан Т.Бадамжунайтай холбоотой, түүнээс салбарласан томоохон хэргүүдийг нээж шалгах бололтой.

Тиймээс цаашид цагдаагийнхны хочилдгоор “Зуудаг” З.Дашдаваа дээр дурдсан хэргүүдийг хэрхэн шийдэх вэ гэдэг л олон нийтийн хувьд сонин байна.

Эх сурвалж: Өдрийн сонин Б.Самдан