Тээврийн Цагдаагийн албаны нээлттэй хаалганы өдөр болж байна. Энэ үеэр иргэдийн амь нас, эрүүл мэндийг хамгаалах чиг үүрэг бүхий байгууллагуудын үйлчилгээг нэг цэгээс авах боломж бүрдэж буй юм. Тухайлбал, Авто тээвэрт оношилгоо хийх, жолооны түр үнэмлэх гаргах, тээврийн хэрэгслийн бусад чиглэлээр иргэдэд мэдээлэл хүргэх, үйл ажиллагаа, техник хэрэгслийн талаар сургалт явуулж байна.

Энэ талаар Тээврийн цагдаагийн албаны Урьдчилан сэргийлэх хэлтсийн дарга, цагдаагийн хурандаа Э.Бөхбатаас тодрууллаа.

-Арга хэмжээний талаар мэдээлэл өгнө үү?

-Өнөөдөр Монгол Улсад Замын хөдөлгөөний дүрэм батлагдсан өдөр тохиож байна. Мөн хүүхдийн аюулгүй байдлыг хамгаалах “Бяцхан зорчигч” аяны нээлттэй хаалганы өдөрлөг болж байна. Энэ хүрээнд төрийн болон төрийн бус байгууллагууд их оролцож байгаа юм.

-Иргэдийн захиалсан жолооны үнэмлэхийг арга хэмжээний үеэр газар дээр нь олгоно гэсэн мэдээлэл яваад байна. Энэ үнэн үү?

-Эрх сэргээхэд шалгалт өгөхгүй болсон шүү дээ. Тухайлбал, иргэдийн хувьд дүрмийн сургалтдаа 4-6 орчим цаг суун сертификатаа авснаар эрхээ сэргээлгэх боломжтой. Энэ тохиолдолд эрхийг сэргээх юм.

-Иргэдийн хувьд ихэвчлэн жолооны үнэмлэх захиалах, эрх сэргээх талаар хандаж байх шиг байна?

-Монгол Улсын Замын хөдөлгөөний хууль тогтоомжид зааснаар зам тээврийн осолд зайлшгүй хүргэдэг хэд хэдэн төрлийн зөрчил байдаг. Үйлдэгддэг 100 орчим зөрчлүүдээс 17 нь хүний амь нас хохироох нөхцөл бүрдүүлдэг тул жолоочийн эрхийг хасах хүртэлх арга хэмжээ авдаг юм. Өнөөдрийн хувьд эрх нь дууссан иргэдийг бүртгэж, сургалтдаа хамруулж байна. Үүнээс биш эрх сэргээх, оноо өгөх ч гэдэг юм уу тийм эрх бидэнд байхгүй.

-Жилд дунджаар хэчнээн хүн эрхээ хасуулж байна вэ?

-Цагдаагийн байгууллагын хяналт шалгалтаар өдөрт согтууруулах ундааны зүйл хэрэглэсэн үедээ тээврийн хэрэгсэл жолоодсон 50 орчим жолооч илэрдэг. Мөн хурд хэтрүүлсэн 10-25 жолооч эрхээ хасуулдаг. Улсын хэмжээнд 1.3 сая жолооч байдаг. Үүний 300 орчим мянган жолооч нь эрхээ хасуулсан байна. Тухайлбал, хурд хэтрүүлсэн, эсрэг урсгалд орсон, улсын дугаар тэмдэгтийг буруу хэрэглэсэн, согтууруулах ундааны зүйл хэрэглэсэн үедээ хөдөлгөөнд оролцох зэрэг тохиолдолд жолоочийн эрхийг хасч байгаа.    

-Эрх хасахад торгуулийн арга хэмжээ давхар тооцох уу?

-Согтууруулах ундааны зүйл хэрэглэсэн үедээ тээврийн хэрэгсэл жолоодсон бол нэг жилээр эрхийг нь хасч, 400 мянган төгрөгөөр торгодог. Мөн хурд хэтрүүлсэн тохиололд хоёр төрлөөр эрхийг нь хасдаг юм. 

-Жолооны үнэмлэх хэвлэн гаргахад бэлдэц байхгүйн улмаас иргэдийн дунд ихээхэн хүлээлт үүсгээд байсан шүү дээ. Энэ тал дээр хэрхэн анхаарч ажиллаж байна вэ?

-Монгол Улсын Замын хөдөлгөөний аюулгүй байдлын тухай хууль батлагдаж, дүрэм шинэчлэгдсэнтэй холбогдуулан өөрчлөлт хийхэд технологийн саатал бага зэрэг гарсан. Бэлдэц нь байхгүй байсан үеийн хуримтлагдсан захиалгыг дэс дарааллаар нь өгч байгаа тул жаахан хүлээлт бий болж байгаа. Гэхдээ дараагийн шинэчлэлт хийх хүртэл жолооны үнэмлэх хэвлэн гаргахад ямар нэгэн бэрхшээл гарахгүй гэж найдаж байна.

Б.Лхам