БНСУ-ын иргэн Ким Ён Жү-д холбогдох хэрэг шүүхэд шилжжээ. Тодруулбал, Монгол Улсад аяллын визээр ирсэн БНСУ-ын иргэн хар тамхи хадгалж байгаад цагдаад саатуулагдсан юм.
"БНСУ-ын иргэн гэртээ хар тамхи хадгалдаг, хэрэглэж байна" гэх мэдээллийн дагуу Хар тамхитай тэмцэх газраас 2019 оны гуравдугаар сарын 22-ноос 23-нд шилжих шөнө шалгалт хийсэн юм. Энэ үеэр Чингэлтэй дүүрэгт түр оршин суугч БНСУ-ын иргэн Ким Ён Жү нь НҮБ-ын 1971 оны “Сэтгэцэд нөлөөт бодисын тухай конвенц”-ын 2 дугаар жагсаалтад багтсан дельта-9 тетрагидроканнабилын агууламжтай савлагааны хамт 159 грамм “Каннабис” хадгалж байсныг илрүүлсэн юм. Уг хэргийг нийслэлийн Прокурорын газрын хяналтан дор эд мөрийн баримтаар хураан авч, мөрдөн шалгах үйл ажиллагааг хийж дуусан яллах дүгнэлттэйгээр хэргийг шүүхэд шилжүүлсэн байна.
Сэжигтэн Ким Ён Жүд Эрүүгийн хуулийн 20.7.1-д зааснаар яллах дүгнэлт үйлдэн хэргийг Чингэлтэй дүүргийн Эрүүгийн хэргийн анхан шатны шүүхэд шилжүүлсэн байна. Одоогоор шүүх хурлын тов гараагүй байгаа юм.
Хэрвээ шүүхээс түүнийг гэм буруутай гэж үзэх юм 1-5 жил хүртэл хугацаагаар зорчих эрхийг хязгаарлах, эсхүл 1-5 хүртэл хугацаагаар хорих ял шийтгэх юм.
Улмаар ял эдэлсний дараагаар Монгол улсаас албадан гаргах юм.
Эх сурвалжийн мэдээлж байгаагаар хар тамхины хэрэгт холбогдсон дээрх иргэн нь Монгол Улсад аяллын визтэй амьдарч байгаа аж. Түүний хувьд гоо сайхны барааг цахимаар худалдаж ашиг олдог байна. Ингэхдээ тэрбээр татварт мөнгө төлдөггүй, түүний зарж байгаа гоо сайхны бүтээгдэхүүн чанарын шаардлага хангасан эсэх мэргэжлийн байгууллагын бичиг огт байдаггүй аж. Өөрөөр хэлбэл, аяллын визтэй хүн бизнес эрхэлж байгаа нь Монгол Улсаас албадан гаргах үндэслэл бөгөөд гэмт хэрэгт холбогдсон тул ГИХГ-аас хэргийг хэрхэн шийдвэрлэх эсэхийг харгалзан Монгол Улсаас албадан гаргах юм байна.