Өнөөдөр Сүхбаатар дүүрэг дэх Хөдөлмөрийн хяналтын улсын ахлах байцаагч М.Баасандорж мэдээлэл хийлээ. Тэрбээр нийслэлийн Мэргэжлийн хяналтын газрын дарга Л.Эрдэнэчулуун өөрийг нь хүчингийн хэрэг хийсэн гэж гүтгэсэн, дарамталсан, авлига хээл хахуулийн хэрэгт холбогдсон гэж ташаа мэдээлэл цацсан гэж мэдээлсэн юм.

Тэгвэл эх сурвалжийн өгсөн мэдээллээр төрийн байгууллагад удирдах албан тушаал хашиж байхдаа М.Баасандорж “Тогоочдын холбоо” нээж давхар ажилласан нь илэрсэн байна. Тиймээс “төрийн албан хаагч давхар ажил гүйцэтгэсэн” үндэслэлээр 14 хоногийн өмнө албан тушаалаа бууруулжээ. Одоо АТГ-д авлигын асуудлаар эрүүгийн хэрэг үүсгэгдэн шалгагдаж байгаа юм байна.

Мөн иргэнээс М.Баасандоржийг хүчингийн хэрэг хийсэн тухай гомдол, мэдээлэл Мэргэжлийн хяналтын газарт иржээ.

Мэргэжлийн хяналтын байгууллага уг гомдлыг холбогдох байгууллагад нь шилжүүлсэн байна. Уг хэрэг Сүхбаатар дүүргийн цагдаагийн хэлтэст шалгагдсан бөгөөд мөрдөн шалгах ажиллагааны явцад хохирогч эмэгтэй нь гомдлоо татсанаар хэрэг хаагдсан аж.

Тодруулбал, М.Баасандорж хэдэн хүмүүстэй цэнгээний газарт согтууруулах ундааны зүйл хэрэглэж байх үедээ нэгэн эмэгтэйг ариун цэврийн өрөө ороход нь хойноос нь очиж хаалгыг нь түгжин хоёр гарыг нь барьж, үнсэх гэж дайрчээ.

Энэ үед эмэгтэй уруулыг нь сэт цохиж, үүнийг нь хүмүүс мэдснээр үйлдлийг таслан зогсоосон байна.

Бид уг мэдээллийг тэнцвэртэй болгох үүднээс НМХГ-ын дарга Л.Эрдэнэчулуунаас тодруулан удахгүй мэдээлэх болно.