С.Зоригийн амь насыг хөнөөсөн хэргийг судлах Түр хорооны дарга УИХ-ын гишүүн Ж.Батзандан, тус хорооны гишүүн УИХ-ын гишүүн Л.Болд нар хорих 401 дүгээр ангид ял эдэлж буй Б.Содномдаржаа, Т.Чимгээ нартай уулзсан билээ.

Уулзалтын дараа УИХ-ын гишүүн Ж.Батзандан тэдний биеийн байдал тааруу байгааг онцолсон юм. Тэрбээр энэ талаар “Т.Чимгээгийн бие нэлээд тааруу байна. Олон сар шулуун гэдэснээс нь цус алдсан гэсэн мэдээллийг өгч байна. Нарийн шинжилгээнд оруулах асуудлыг яаралтай шийдвэрлэх чиглэлийг өгсөн. Содномдаржаагийн бие ч тааруу байна. Ядарсан, тамирдсан харагдаж байна лээ.

Эмчилгээ хийж байна гэх боловч ч хорих ангийн эмнэлгийн эмчилгээний чанар хангалттай биш гэдэг нь харагдаж байна. Гэм зэмгүй хүнийг хорих ангид авчирч ямар ч халаалт, цонхгүй өрөөнд хөлдөөж алах нь холгүй эрүүдэн шүүж байсан. Энэ бол эрүүдэн шүүлтийн том хэлбэр. Мөн Т.Чимгээ, Б.Содномдаржаа нар хилс хэрэг үүрсэн гэдгийг Түр хороо олон баримтаар тогтоож байгаа. Түр хорооны долоон гишүүн олон хүнтэй уулзсан. Хэргийн материалтай ч танилцсан. Энэ хоёр бол хэлмэгдсэн хүмүүс. Тиймээс яаралтай суллуулах талаар Түр хороо ажиллаж байна. Түр хорооны ажилд саад болж байгаа хэдэн шүүгч нар байна. Гэхдээ удахгүй үнэнд гүйцэгдэнэ” гэв.

Түүнчлэн УИХ-ын гишүүн Л.Болд “Т.Чимгээ гурван хүүхэдтэй. Нэг охиноо хоригдож байх хугацаандаа алдсан. Харин Б.Бодномдаржаа найман хүүхдийн аав.  Маргааш эх үрсийн баяр тохиох гэж байна. Тиймээс ээж аав, ойр дотны хүмүүстэй нь уулзуулсан. Бид жил гаруй хугацааны өмнө уулзаж байсан. Тухайн үеийнхийг бодвол сэтгэл санаа нь дээрдсэн байна. Мөн эрх нь зөрчигдсөн энэ хоёр хүнийг суллахын төлөө ард түмний хөдөлгөөнийг өрнүүлж байна. Иргэд гарын үсгээ зурж, нэгдээсэй гэж хүсч байна. Эрүүдэн шүүлт 400 гаруй хоног үргэлжилсэн. Үүнээс Т.Чимгээг 100 гаруй хоногийг харанхуй өрөөнд эрүүдэн шүүлт явуулсан байна. Т.Чимгээ хэлж байна лээ. Намайг фудволк, дотуур өмдтэй байлгасан. Усанд орж, дотуур хувцсаа ч солих эрхгүй хорьсон гэсэн. Шөнө ч унтах эрхгүй эрүүдэн шүүлт амсаад хавиргаа хугалуулаад өглөө нь байцаалтанд ороход байцаагч нь дооглоод инээсэн гэж байна. Эрүүдэн шүүлтийн бичлэгээс гаргаж болох хэсгийг нь олон нийтэд цацаж болох уу гэдэг саналыг Т.Чимгээ, Б.Содномдаржаа нар хоёулаа зөвшөөрсөн. Тиймээс Түр хороонд асуудлыг хөндөж, бичлэгийг ил болгохын төлөө явна. Ингэж задалсны дараа энэ үзэгдэл байдаг л зүйл мэт ярьдаг улстөрчид ичих болно гэдгийг албан ёсоор хэлье” гэлээ.

Б.Лхам