Өнгөрсөн дөрөвдүгээр сард Монгол Улсад ашиглахыг хязгаарласан химийн хорт болон аюултай бодисын жагсаалтад орсон мөнгөн усыг худалдахыг завдсан хэрэг  гарсан юм. Тодруулбал, цагдаагийн байгууллагаас цахим орчинд “Мөнгөн ус зарна” гэх зар байршуулсан байсны дагуу шалгалтын ажиллагаа явуулан гурван бүлэг этгээдийг баривчлах үеэр 74 кг мөнгөн ус худалдах зорилгоор хадгалж, тээвэрлэсэн нь тогтоогдсон юм.

Уг хэргийг Эрүүгийн цагдаагийн газраас дээрх хэргийг илрүүлж, үйлдлийг таслан зогсоосон бөгөөд их хэмжээний мөнгөн ус тээвэрлэсэн сэжигтнүүдэд Эрүүгийн хуулийн 24.3-т заасан Химийн хорт болон аюултай бодисыг хууль бусаар эргэлтэд оруулахыг завдсан үндэслэлээр эрүүгийн хэрэг нээж, мөрдөн шалгасан байна. Тэгвэл мөрдөн шалгах ажил дуусч, яллах дүгнэлт үйлдүүлэх саналтайгаар прокурорын байгууллагад шилжүүлжээ. Дээрх сэжигтнүүдийн хадгалж, тээвэрлэсэн мөнгөн ус нь зах зээлийн ханшаар 52тэрбум төгрөгийн ханштай юм байна.

Ташрамд дурдахад, мөнгөн усыг улсын хилээр хууль бусаар хил нэвтрүүлсэн хэрэгт  улс төрд нөлөө бүхий хэд хэдэн эрх мэдэлтнээс гадна хууль хяналтын цөөнгүй албан тушаалтныг шалгаж байгаа гэх мэдээлэл бий юм.

 

Г.Эрдэнэ