Монголын Хуульчдын холбооноос "Эрх зүйн шинэчлэлд хуульчдын үүрэг, оролцоо" уриан дор "Хуульчдын форум"-ыг энэ сарын 13-нд зохион байгуулсан юм. Энэ үеэр Хуульчдын бие даасан байдлын асуудлаар Хуульчдын холбооны Ерөнхийлөгч Ж.Хунангаас тодрууллаа.

-Хуульчдын хараат бус байдал буурсан тухай яригдах боллоо. Та Хуульчдын  холбооны Ерөнхийлөгчийн хувьд тайлбар өгөөч?

-Хуульчид нийгэмд шударга ёсыг сахиулах, хүний эрхийг хамгаалах чиг үүрэг хүлээдэг. Тиймээс хуульчдын хараат бус бие, даасан байдал хамгийн чухал. Хуульчдын холбоо нь нийт хуульчдыг гишүүнээрээ элсүүлсэн мэргэжлийн өөрөө удирдах ёсоор зохион байгуулагдсан байгууллага. Хуульчдын хувьд бусдаас  хараат бусаар ажиллаж, нийгэмд болж, бүтэхгүй байгаа зүйлд санал бодлоо илэрхийлээд явж байна. Тодорхой албан тушаал эрхэлдэг хуульчдын хараат бус байдал зарим талаараа сайжирсан ч нөгөө талаасаа эрсдэл үүсэх нөхцөл байдал бий болсон гэж бид үзэж байгаа.

-Хуульчдын эрх зүйн байдлыг дээшлүүлж, хараат бус бие даасан байдлыг бий болгоход асуудлын гол нь хаана байна вэ?

-Үндэсний Аюулгүй байдлын зөвлөмжөөр шүүгч, прокурорыг түдгэлзүүлэх боломжийг бий болгосон нь эрсдэл дагуулж байна.

-Гарч болох эрсдэл нь яг юу юм бэ?

-Шүүгч, прокурорыг мэргэжлийн үйл ажиллагаа явуулж байхад нь гүйцэтгэх болон хууль тогтоох эрх мэдлийн  албан тушаалтнууд Ерөнхийлөгчтэй хамтарч үүрэгт ажлаас нь чөлөөлөх эрсдэлтэй. Учир нь гүйцэтгэх болоод хууль тогтоох эрх мэдлийн олонх албан тушаалтнууд тодорхой нэг намын бодлого шийдвэр, улс төрийн сонирхолоор  сонгогдсон хүмүүс шүү дээ. Одоогийн байдлаар чөлөөлсөн асуудал байхгүй ч ирээдүйд тийм эрсдэл гарч болзошгүй.

-Хуульчидтай холбоотой гомдол, мэдээллийн цөөн хувь нь л шийдвэрлэгдэж байна гэж “Хуульчдын форум” дээр яригдаж байсан. Энэ талаар тайлбар өгнө үү?

-Шийдвэрлэгдсэн гомдол, мэдээллэл бага мэт харагдах боловч тоон хэмжээг аваад үзвэл боломжийн хэмжээнд гэж хэлж болно. Учир нь хуульчид өндөр хариуцлагатай хүмүүс. Тэр бүр асуудалд өртөөд байдаггүй. Цөөн хэдэн хуульчид хууль бус асуудалтай нэг холбогдсныг эс тооцвол хуульч болгон хууль бус үйлдэлтэй нэр холбогддог юм биш. Сүүлийн үед цахим орчинд нотлогдоогүй мэдээллийг цацдаг. Үүнийг нь иргэд ямар ч цензургүйгээр хүлээж авдагаас болж ажил үүргээ гүйцэтгэж яваа энгийн хуульчид олноор хэлмэгдэж байна. Нөгөөтэйгүүр, хуульчдад хариуцлага тооцдог механизм нь бий. Тухайлбал, өнгөрсөн онд гэхэд таван өмгөөлөгчийн өмгөөлөх эрхийг цуцалсан. Сахилгын арга хэмжээ авахаас эхлээд ёс зүйн хариуцлагыг цаг тухайд нь хүлээлгэдэг.

Б.Лхам