АТГ-аас сар бүрийн 25-ны өдөр хэвлэлийн бага хурал хийж, сэтгүүлчдын сонирхсон асуултад хариулдаг уламжлалтай. Энэ удаагийн хуралд Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүү, Судалгаа шинжилгээний албаны дарга, ахлах комиссар Ц.Шинэбаяр нар оролцлоо.

-Шведэд Монгол Улсыг төлөөлөн Элчин сайдаар сууж байгаад эгүүлэн татагдсан М.Энхсайханыг баривчилсан. Гэтэл шүүхээс үргэлжлүүлэн хорих шаардлагагүй гэсэн. Эндээс АТГ-ын алба хаагчид мөрдөн шалгах ажиллагааг гүйцэт явуулаагүй байна гэсэн зүйл ажиглагдаж байна. Хуулийн хүрээнд албан үүргээ гүйцэтгэж чадаж байна уу?

-Эрүүгийн хэрэг хянан шийдвэрлэх тухай хуулийн 31.5 дугаар хэсэгт сэжигтнийг шүүхийн зөвшөөрөлгүй баривчилах заалт бий. Үүнд хойшлуулашгүй болон гэмт хэрэг үйлдэж байхад нь гэх мэт. Манай байгууллагын үйл ажиллагааг хууль зөрчсөн зүйл байхгүй. Барьж хорьж байгаа асуудал нь дээрх хуулийн дагуу явагдсан. Шүүхийн шийдвэр гараагүй байхад хэнийг ч гэм буруутайд тооцох ёсгүй. Тухайн сэжигтэн, яллагдагчийг цагдан хорих шаардлага бий гэж үзвэл, прокурорын хяналт дор, шүүхийн зөвшөөрлөөр хийгддэг ажил.

-Хөгжлийн банктай холбоотой хэргийг шалгаж байна уу?

-Мөрдөн шалгах ажиллагаа үргэлжилнэ. Хөгжлийн банктай холбоотой асуудлын хувьд энэ бол зөвхөн нэг хэрэг биш. Хэд хэдэн эрүүгийн хэрэг. Шалгаж байгаа. Олон жил дамжин шалгагдаж байгаа асуудал. Прокурорын зөвшөөрлөөр өгсөн мэдээллийг улс төрийн зорилгоор ашигладаг зүйл ажиглагдах болсон. Тиймээс хуульд заасан хүрээнд мэдээлэл өгнө.

-Жастын Ш.Батхүүд холбогдох хэрэг ямар шатандаа явна вэ. Оюутолгойн гэрээтэй холбоотой асуудлыг шалгаж дууссан уу?

-Ш.Батхүүд холбогдох хэрэг шүүхийн шатанд шилжсэн. Газрын даргын өгсөн мэдээллээр Оюутолгойн гэрээтэй холбоотой асуудлыг удахгүй шүүхэд шилжүүлнэ.

-“Эрэл”-ийн Б.Эрдэнэбатад холбогдох гомдол ирсэн үү, шалгаж байна уу?

-Энэ талаарх мэдээлэл алга. Тодруулаад эргээд хэлнэ.

Г.Алимаа