Энэ сарын 24-ны өдөр буюу өчигдөр ОСНААУГ-ын ариутгалын жолооч ажилтай, 1988 онд төрсөн “У”  болон "Дайцэцэн" ХХК-д засварчин ажилтай, 1985 онд төрсөн “Б” нар харамсалтайгаар амиа алдсан хэрэг гарсан билээ.

Энэ талаар ОСНААУГ-ын хэвлэл мэдээлэл, нийгмийн асуудал хариуцсан мэргэжилтэн О.Ган-Эрдэнэ  “Осол гарах үед амиа алдсан манай ажилтан хувийн орон сууцны конторын хоёр ажилтантай хамт бохирын худаг дахь хуримтлагдсан бохирыг татан зайлуулахаар болсон. Гэтэл засварчин залуу бохирын худаг руу орсны дараа ухаан алдах үед манай ажилтан өнөө залууг аврахаар орж улмаар өөрөө мөн хортой хийнд хордож амиа алдсан” гэлээ.

Осолд орж амиа алдсан жолооч нь тус байгууллагад таван жил ажиллаж байгаа юм байна. Байгууллагын дотоод журмын дагуу ажил үүргээ гүйцэтгэж яваад амиа алдсан талийгаачийн оршуулгын зардлыг даахаас гадна ар гэрийнхэнд нь нэг сая төгрөгийн дэмжлэг олгохоор болжээ.

Г.Алимаа