Энэ оны тавдугаар сарын 15-ны өдрөөс Улаанбаатар хот руу түүхий нүүрс оруулахыг Засгийн газрын тогтоолоор хориглосон. Үүнд мэргэжлийн хяналт, цагдаагийн байгууллагаас хяналт тавихаар авто тээврийн шалган нэвтрүүлэх 3 товчоо, хяналтын 4 цэгт албан хаагчид 24 цагаар ажиллаж байна.
Шалгалт эхэлснээс хойш 13 тээврийн хэрэгсэлээр 377 тонн түүхий нүүрс Агаарын чанарыг сайжруулах бүс рүү зөвшөөрөлгүй нэвтрүүлэхийг завдсныг илрүүлж, буцаажээ.
Мөн Өмнөговь аймгийн "Эрдэнэс Таван толгой" ХК-аас Төв аймгийн Баянчандмань сум руу Лел метал ХХК-аас 10 тээврийн хэрэгсэлээр 331.5 тн нүүрс тээвэрлэсэн, Улаанбаатар хотоор дамжин өнгөрүүлэх явцад хяналт тавьсан байна.
Өлзийт дэх автотээврийн шалган нэвтрүүлэх товчоогоор 2,073 тээврийн хэрэгслээр 103 мянган тонн “Таван толгой түлш” ХХК-ийн сайжруулсан шахмал түлшний түүхий эд болох угаасан нүүрсийг Өмнөговь аймгийн Цогтцэций сумын “Энержи ресурс” ХХК-иас Улаанбаатар хот руу тээвэрлэснийг шалгаж нэвтрүүлжээ.
Эх сурвалж: НМХГ
