Баярын өдрүүдэд нутагт зам тээврийн ноцтой ослууд гарч эрдэнэт хүний амь нас эрдсэн харамсалтай хэрэг олон бүртгэгджээ. Уг ноцтой ослуудыг дан эмэгтэй жолоочид үйлдсэн нь анхаарал татаж байна.

Үүнд:

- Дорнод аймаг Цагаан-овоо суманд машинд хүүхэд дайруулсан мэдээллийг цагдаагийн байгууллага энэ дугаар сарын 13-ны өдрийн 06.03 цагт хүлээн авч шалгасан байна. Шалгалтаар тус сумын 5 дугаар баг сумын төвөөс баруун урагш 14 км зайд байрлах “Гүн цэнгэлэг” нэртэй нуурын эрэг орчимд 25 настай "О" нь автомашин жолоодон явах үедээ голын эрэг дээр амарч байсан иргэдийн майхан дээгүүр санамсаргүй гарсны улмаас 06, 07 сартай 2 эмэгтэй хүүхэд нас барсан байна. Мөн 3, 11, 25 настай 3 хүн гэмтжээ. Уг хэргийг Дорнод аймаг дахь Цагдаагийн газар шалгаж байна.

- Хэнтий аймаг “Чингис хотын хаалганы ойролцоо зам тээврийн осол гарсан байна” гэсэн мэдээлэл энэ сарын 12-ны 09:52 цагт ирсэн байна. Шалгалтаар 33 настай эмэгтэй "Э" нь тээврийн хэрэгсэл жолоодож явахдаа замын хажуу руу онхолдож, зорчиж явсан 5, 10, 21 настай 3 хүн газар дээрээ нас барж, 28-30 насны 2 хүн гэмтсэнийг Хэнтий аймаг дахь цагдаагийн газар шалгаж байна.  

- Төв аймаг Аргалант сумын Хөшөөт 2  дугаар багийн нутагт тээврийн хэрэгсэлд хүн дайруулж нас барсан гэсэн мэдээлэл энэ сарын 11-ний өдрийн 20:05 цагт хүлээн авч шалгасан байна. Шалгалтаар 38 настай эмэгтэй "А" нь өөрийн тээврийн хэрэгслээр нөхөр болох "Э" /эр, 41настай/-г мөргөж амь насыг нь хохироосон байна. Уг хэргийг Төв аймаг дахь Цагдаагийн газар шалгаж байна.

Иймд жолоочид та бүхэн тээврийн хэрэгсэл жолоодохдоо замын хөдөлгөөний дүрмийг баримтлан хөдөлгөөнд анхаарал болгоомжтой оролцохыг анхааруулж байна.

#ЯараадЯахавДээ