Одоогоос хэд хоногийн өмнө сураггүй алга болсон иргэнийг эрэн хайх ажиллагаанд цагдаагийнхан хайнга хандсан. Үүний улмаас алга болсон иргэнийг нас барсны дараа оллоо хэмээн талийгаачийн эхнэр Б.Болороо гомдолтой байгаагаа мэдэгдсэн. Тэгвэл Б.Болороо бүсгүйн ар гэрт тохиолдсон харамсалтай хэрэгтэй холбогдуулан ЦЕГ-ын дарга С.Баатаржав өнөөдөр үүрэг өгч албаны шалгалт явуулахаар болжээ.

Энэ тухай ЦЕГ-ын Хэвлэл мэдээллийн төвийн дарга, дэд хурандаа Б.Баатархүү “ЦЕГ-ын дарга тэргүүн дэд дарга, мөрдөн байцаах албаны дарга нарт Ерөнхий газрын дарга, цагдаагийн хурандаа С.Баатаржав дөнгөж сая үүрэг чиглэл өглөө. Тодруулбал, “Сонгинохайрхан дүүргийн цагдаагийн I хэлтэст шалгагдаж байгаа эл хэрэгт биечлэн хяналт тавьж шалга” гэдэг үүрэг өглөө. Мөн дотоод хяналт шалгалт, аюулгүй байдал хариуцсан дэд даргад тухайн амиа алдсан иргэнийг эрэн сурвалжлах ажиллагаа хууль тогтоомжын дагуу явагдсан эсэхэд албаны шалгалт хийж дүнг танилцуулах үүрэг өгсөн. Хэрвээ цагдаагийн байгууллага эрэн сурвалжлах ажиллагаанд алдаа дутагдал гаргасан байвал буруутай албан тушаалтанд хатуу хариуцлага тооцохоо мэдэгдсэн. Албаны шалгалтын дүнг иргэн мэдээлэх болно” гэлээ.

Г.Алимаа