Монгол Улсад суурьшин тагнуул хийж байсан гэх Тайванийн иргэн Ван Чен Хуныг ТЕГ-ын Сөрөх тагнуулын газрынхан баривчилсан байна. Түүний үйлдсэн хэргийг нотлох баримтаар баримтжуулсан бөгөөд нийслэлийн Прокурорын газарт шилжүүлж, улмаар Баянзүрх дүүргийн Эрүүгийн хэргийн анхан шатны шүүхэд хүргүүлжээ.

Тодруулбал, Сүхбаатар дүүргийн нутаг дахь “Голомт” хотхоны “С” байранд 2018 оны аравдугаар сарын 2-нд Тагнуулын ерөнхий газрын Мөрдөн байцаах хэлтэс, Сөрөх тагнуулын газар, тусгай албаныхантайгаа хамтран гадаадын нэг иргэний түрээсэлдэг байранд нэгжлэг хийсэн билээ.

Уг байранд Тайванийн иргэн Ван Чен Хун амьдардаг байсан аж.

Нийслэлийн Прокурорын газраас Ван Чен Хуныг Эрүүгийн хуулийн 19.10 дугаар зүйлийн 1-д заасан “Гадаадын иргэн, харьяалалгүй хүн Монгол Улсын нутаг дэвсгэрт тагнуул хийсэн” гэсэн үндэслэлээр яллах дүгнэлт үйлдсэн байна. Харин түүнд мэдээлэл дамжуулж байсан гэх хэрэгт холбогдсон, тагнуулын байгууллагад ажилтан Д.Амгалан, А.Мөнхжаран нарыг Эрүүгийн хуулийн 19.4-2 дахь хэсэгт заасан “Монгол Улсын иргэн гадаад улсын тагнуулын албатай хамтран ажилласан, гадаадын байгууллага, иргэнд төрийн нууцад хамаарах мэдээ, баримт, эд зүйлийг албан тушаал, ажил үүргийн хувьд мэдсэн этгээд дамжуулсан”, 19.12-2 дахь хэсгийн “Төрийн нууцыг итгэмжлэгдэн хариуцсан, албан тушаал, ажил үүргийн хувьд мэдсэн этгээд төрийн маш нууц, онц чухал-маш нууцыг задруулсан”, 17.4-2 дахь хэсэг дэх “Албан тушаалаа ашиглаж эд хөрөнгө завшсан” гэх үндэслэлээр яллах дүгнэлт үйлджээ.

Зарим эх сурвалжуудын мэдээлснээр тагнуулын байгууллагын албан тушаалтнууд Тайванийн иргэнд хоёр жил орчим мэдээлэл дамжуулж байсан нь шалгалтаар тодорхой болсон байна.

Тэгвэл энэ сарын 22-ны өдөр болсон шүүх хурлаар ТЕГ-ын ажилтан Д.Амгалан, А.Мөнхжаран, Тайванийн иргэн Ван Чен Хун нарын гэм бурууд тоооцжээ. Тодруулбал, Ван Чен Хунд 13 жилийн хорих ял, Монгол Улсын иргэн Д.Амгаланд 13 жил 3 сарын хорих ял,  А.Мөнхжаранд 13 жилийн хорих ял тус тус оногдуулж, ялыг хаалттай хорих ангид эдлүүлэхээр шийдвэрлэсэн байна.